Натонуш шәһәрдики йеганә туйғулар: шаирә фатимә сәйяһ

“мән натонуш шәһәрдики көрүнмәс адәм, ички туйғулиримға хәлқим бешидики паҗиәдин туғулған азаб-оқубәт сиңип кәткән” дәйду, шаирә фатимә сәйяһ өз шеирлири һәққидә тохтилип.

Униң ейтишичә, у йеқида қәләмгә алған “қәтлиам”, “мән яшаймән” қатарлиқ шеирлирида бу хил туйғулирини биваситә ипадиләшкә тиришқан.

Шаирә фатимә сәйяһ 1980-йили қәшқәрдә туғулған. Униң әсли кәспий геохимийә болуп, у 2010-йилидин 2018-йилиғичә италийә, германийә вә америка қатарлиқ әлләрдә оқушни давамлаштуриду вә доктор кандидати болиду. 

Шаирәниң иҗадий һаяти гәрчә қәшқәрдә башланған болсиму, униң рәсмий әсәр елан қилиши 2018-йили 10-айда америкада нәшр қилинған “натонуш шәһәр” намлиқ шеирлар топлими билән башлиниду. Шаирәниң “әркинлик” намлиқ шеири түркчигә тәрҗимә қилинип, 2019-йили түркийәниң “ай вақти” журнилида елан қилиниду.

Шаирә фатимә сәйяһ һазир австралийәдә яшимақта.

Мән яшаймән

Мән яшаймән

Парчиланған роһум

Рәзилликләр булғимақчи болған йүриким

Миңлиған шәһидларниң қанлиқ һекайиси

Милйонлиған қара булутниң еғири билән


Мән яшаймән

Соғуқ көзләрдин тамған пәрвасизлиқ

Қетип кәткән алтунларниң мәсхириси

Бешимға еқип көммәкчи болған нефитләр

Азабимға от чачидиған әҗдиһа билән

Мән яшаймән

Яшаймән

Көк тилимни қизилға бойимақчи болған науста билән

Волқанлиқ әйнәкләрни чақмақчи болған

Йәр ютқурлар билән яшаймән!

Мән яшимаймән

Яшнаймән!

Мени бир өлтүрсәң

Миң тирилип

Әң қабаһәтлик реаллиқиңға айлинип


Қәтлиам

Һәтта аччиқлинишлиримизму шу қәдәр күчсиз, 

Нәпрәтлиримизгә өзимизму ишинәлмәймиз.

Мана бу бизниң паҗиәйимиздур, 

Биз өзимизниң ялғанлиқиға ишәндүрүлгән кишиләрмиз.

Қәтлиамдики биз

Ечилмайдиған ишикләр

Түзләнгән йәр

Қулуп селинған окян

Чеқиветилгән тағ. . .