Almutadiki Uyghur sha'iri gülnare awutowa we uning bir qisim shé'irliri

Muxbirimiz jüme
2020-12-18
Share
Almutadiki Uyghur sha'iri gülnare awutowa we uning bir qisim shé'irliri Edebiyatshunas alime gülnare awutowa xanim.
RFA/Oyghan

"Dutar chélip, toyda külüp,

Yayrisammu,

Muqamimdin dur tökülüp,

Sayrisammu,

Teqdir bolup, xep, pütülüp,

Qayrisammu,

Qara bulut zep tutulup,

Échilmidi."

Bu Uyghurlarning nöwettiki weziyitidin échin'ghan sha'ire gülnare awutowa qelemge alghan sansiz misralardin bir qetredur, xalas.

Gülnare awutowa almuta wilayitining Uyghur nahiyisige qarashliq dolata yézisida dunyagha kelgen. U 1987-abay namidiki qazaq pédagogika institutining, yeni hazirqi qazaq milliy pédagogika uniwérsitéti filologiye fakultétining rus-Uyghur bölümini tamamlighan we qazaqistan penler akadémiyesidiki Uyghurshunasliq institutigha xizmetke chüshken.

U1994-yili "Lutpulla mutellipning ijadiy mirasi" namliq ilmiy tetqiqati bilen filologiye penlirining doktor namzati bolghan.

Gülnare awutowaning ijadiy pa'aliyiti mektepte oqup yürgen chaghliridin bashlan'ghan. Uning shé'irliri nahiyelik "Ili wadisi", "Uyghur awazi" we uning qoshumchisi ereb yéziqidiki "Yéngi hayat" gézitliride, shundaqla "Perwaz", "Arzu", "Ijadkar", "Uyghur pén" qatarliq zhurnallarda élan qilin'ghan.

1990-Yili uning "Gülzarim" namliq tunji shé'irlar toplimi yoruq körgen. Uning eserliri yene "Anilar awazi", "Shé'iriyet gülzari", "Qazaqistan-méning wetinim" ge oxshash toplamlardin orun alghan.

Gülnare awutowaning shé'irliri rus tilighimu terjime qilinip, ular almuta we moskwa sheherliridiki üch tomluq "Nézawisimiy kazaxstan", "Madonni turana"," qatarliq toplam we zhornallarda élan qilin'ghan.

2012-Yili bashqurtstanda ötken "Xelq'ara türkiy tilliq poyéziye" musabiqiside sha'irening qayrat baqbérgénof terjimisidiki bir qanche shé'irliri "Muhebbet lirikisi" derijisi boyiche 3-derijilik mukapatliq orun'gha érishken.

U2015-yildin bügünki kün'ge qeder abay namidiki qazaq milliy pédagogika uniwérsitétining filologiye we köp tilliq bilim bérish institutida oqutquchi bolup xizmet qilip kelmekte.

Échilmidi

Gülnare awutowa

Échilmidi, méning könglüm

Échilmidi.

Mungluq bashqa pelektin nur

Chéchilmidi.

Bahar bolup chéchek gülüm

Échilmidi.

Échilmidi méning gülüm

Échilmidi.

Dutar chélip, toyda külüp,

Yayrisammu,

Muqamimdin dur tökülüp,

Sayrisammu,

Teqdir bolup, xep, pütülüp,

Qayrisammu,

Qara bulut zep tutulup,

Échilmidi.

Échilmidi méning künüm

Échilmidi.

Ejdadlirim rohigha ming süyensemmu,

Tarixidin deris élip, ögensemmu,

Ewlatlirim meghrurluqin chüshensemmu,

Échilmidi, méning sirim

Échilmidi.

Özge dostlar közge méni

Héch ilmidi.

Hesritimdin "Qizip qéni"

Échinmidi.

Shundimu rast, qeddim méning

Égilmidi.

Amma könglüm miskin héli

Échilmidi.

Ümid yultuzi

Ümid yultuzi, öchüp baramsen,

Kökte parlimay chöküp baramsen.

Sanga telmürgen qara közlerdin,

Qanliq yashlarni töküp baramsen?

Qara tünlerde günsiz nur chéchip,

Ishench chiriqi bolup yanamsen.

Nimjan janlargha küchidin kétip,

Yiqilsa, yölep, saqlap qalamsen?

Ümid yultuzi, bolsangmu ghuwa,

Bar bol, ilahim, kütken bexittek.

Kürming qismetke özengsen guwah,

Taliship, yetmes altun texttek!

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet