Ressam gülnaz tursun: “Men xelqimning qelbide azadliqqa ishench turghuzushni isteymen”

Aldinqi qétimliq anglitishimizda qazaqistanda yashap ijadiyet bilen shughulliniwatqan yash Uyghur ressam gülnaz tursun xanimning sen'et qarishi we uning ijadiyitide 2017-yilidin kéyin körün'gen özgirishler heqqide ishlen'gen programmini huzurunglargha sun'ghan iduq. Bügün gülnaz tursun xanim bilen uning yéqinqi bir qisim eserlirining sizilish sewebi we uning bu arqiliq ipadilimekchi bolghan mezmunlar heqqide ötküzgen söhbitimizni diqqitinglargha sunimiz. Ressam söhbet jeryanida eserliridiki rengler we bezi simwolluq éléméntlar heqqide toxtaldi.

U ziyaritimiz jeryanida, öz eserliri arqiliq kishilerning qelbide azadliqqa bolghan ishench turghuzushni isteydighanliqini bildürdi.

U mundaq dédi: “Men balilirimizgha bizning charesiz qalghanliqimizni, pütkül dunyaning bizge yardem qilmay tetür qariwalghanliqini emes, belki Uyghurlarningmu tarixta qudretlik impériyelerni qurghan ulugh xelq ikenlikini, Uyghurlarning bu qiyin künlerni atlitip, hör bolidighan kelgüsige érisheleydighanliqigha ishench tuyghuzushni arzu qilimen.”