Kök böre rohigha séghin'ghan sha'ire-tashgül héziyarowa

Muxbirimiz jüme
2020-09-18
Élxet
Pikir
Share
Print
Sha'ire tashgül héziyarowa.
Sha'ire tashgül héziyarowa.
RFA/Oyghan

Bügünki sehipimizde qazaqistanda yashap ijadiyet bilen shughulliniwatqan Uyghur sha'iri tashgül héziyarowa xanimni tonushturup ötimiz.

Bügün séni eslep keldim, bahadir, 
Qebrengdin derdke derman tapay dep. 
Séni tughqan kök börining ewladin, 
Shé'ir bilen ghezellerge qatay dep. 

Mana sha'irening sherqiy türksitan milliy armiyisining qehrimani ghéni baturning rohini séghinip qelemge alghan "Ghéni batur" namliq shé'irdin élin'ghan bir misradur, 

Undaqta sha'ire tashgül kim? 

Sha'ire tashgül danaxun qizi héziyarowa 1954-yili Uyghur élining ghulja shehiridiki herembagh mehelliside dunyagha kelgen. 1956-Yili a'ilisi bilen sabiq sowét ittipaqigha köchüp chiqqan. Mektepte oquwatqan yilliridin bashlap uning shé'irliri nahiyelik, wilayetlik, jumhuriyetlik gézit sehipiliride bésilishqa bashlighan, 1978-yili "Köngülde qalmisun arman" namliq omumiy toplamda bir türküm shé'irlirigha kirgüzülgen, kéyinki yillarda uning hékayiliri, shé'irliri, ochérkliri bir qatar toplamlarda, shundaqla "Uyghur awazi", "Yéngi hayat", "Emgekchi qazaq" gézitliride, "Intizar", "Meripet" zhurnallirida élan qilinip, mushu kün'giche oqurmenlerning yaqturup oqushigha érishken. 

2006-Yili tijaretchi dilmurat quziyéfning maddiy yardimi bilen uning "Qelbim nidasi" namliq tunji shé'irlar toplimi yoruq körgen we "Ilham" mukapatigha érishken.

Sha'ire özining "Dolana", "Axirqi yapraq" namliq toplamlirida insanlar arisida uchraydighan ‍illetlerni pash qilip, zamandashlirini bir-birining qedir-qimmitini bilip yashashqa dewet qilidu.

Tashgül héziyarowa nöwette qazaqstan jumhuriyetlik musteqil "Asiya bügün" gézitining bash muherriri, "Emgek chiqazaq nahiyesining pexriy puqrasi", "Tinchliq dunyasi" xelq'araliq qazaq ijadiy teshkilati teripidin tesis qilin'ghan xelq'ara zhurnalistlar ittipaqining ezasi, shundaqla "Balasaghun" ordénining sahibi.

Ghéni batur

Tashgül héziyarowa

Ghulja yoli, ghulja yoli séningde, 
Ejdadimning bésip ötken izi bar. 
Mesh'el bolup yan'ghan ghéni baturdek, 
Qirchin ketken onche oghul-qizi bar.

Shunga herkim rohlirini yad eylep, 
Du'a qilar tupraqlargha yetkende. 
Qedrin bilmey térikide yaxshining, 
Emdi yighlap yürimizken ketkende.

Sende méngip ala xurjun müride 
Ejdadimning tapanliri téshilgen. 
Panah izdep kelgen ghéni baturning, 
Teqdirimu bir özengde yéshilgen.

Öz baghringgha élip tinch yatisen, 
O, ana yer, yolwas yürek ghénini. 
Ewladliring tiz püküp, bash égidu, 
Elem otta örtep otluq dilini.

Bügün séni eslep keldim, bahadir, 
Qebrengdin derdke derman tapay dep. 
Séni tughqan kök börining ewladin, 
Shé'iri bilen ghezellerge qatay dep.

Kötür bashni, qedding pükme, ewladim, 
Izlar bésip yash ghénilar kélidu. 
Erkinlikni büyük qazaq xelqidek, 
Bizgimu hem rebbim allah béridu.

Toluq bet