'Goldmen saks' guruhining meqsiti xitayni ghulitishmu?

Yéqinqi künlerdin buyan, kanadada chiqidighan yer shari mektupliri géziti we amérikida chiqidighan nyuyork waqit géziti qatarliq xelq'araliq metbu'atlar we tor betler yazghuchi li delin yazghan "goldmen saks süyiqesti" namliq kitabning xitayda sétilish miqdarining pewqul'adde éship ketkenlikini munazire qilmaqta.
Muxbirimiz gülshen abduqadir
2010-09-01
Share

"Goldmen saks" amérikining wall strét soda baziridiki eng chong pay chek we pul mu'amile gewdisidin ibaret bolup, uning dunyaning herqaysi jaylirida, bolupmu xitayda tesir da'irisining zorluqi melum.

Kitabning 1- babi "xitayni ghulitish"

Aptor kitabida amérikida yüz bergen dunyagha tesir körsetken iqtisadi krizisni "goldmen saks" shirkitining, amérika pay chek bazirida saxtipezlik qilghanliqi we amérika xelqini qaqti - soqti qilghanliqi sewebidin kélip chiqqan dégen idiyini ilgiri sürgen.

"Gold men saks süyiqesti " namliq kitabning 1-babi "xitayni ghulitish" tin ibaret bolup, aptor kitabida "goldmen saks" ning amérikidin qalsa xitayda tesirining zorluqini, uzun yillardin buyan bu shirketning xitay yéza igilik bankisi we xitay merkizi bankiliri satqan paydini xelqqe ötünüp bérish xaraktéridiki paycheklirining zor bir qismini sétiwalghanliqini, hazir xitay iqtisadining asasen "goldmen saks" shirkitining qolida ikenlikini, amérika iqtisadini chöktürgen bu shirketning emdiki nishanining dunya boyiche 2- orunda turidighan iqtisadi küchlük dölet xitayni ghulitish ikenlikini ilgiri sürgen.

"Goldmen saks süyiqesti" namliq kitabta bu shirketning, amérika iqtisadi sahesidiki saxtipezlikige a'it nurghunlighan delil ‏- ispatlarni körsetken bolup, aptor bu heqte amérika sotining delil ‏- ispatlirinimu kirgüzgen. U yene kitabida amérika hökümet emeldarlirining "goldmen saks" shirkitide melum emili barliqini, amérika yuqiri tebiqe emeldarlirining perde arqisida nurghunlighan yoshurun süyiqestlerni pilanlawatqanliqini, emdiki nöwetning xitaygha kelgenlikini ilgiri sürgen.

Aptor "goldmen saks" ni tülkining söngek ghajilishigha oxshatqan

Xitayning, xitay jem'iyitide wehime peyda qilidighan kitab- zhurnallarning sétilishini qattiq kontrol qilghinigha qarimay, "gold men saks"ning xitayda chiqidighan sina toridiki sétilish miqdari pewqul'adde yuqiri bolup, bu yil iyundin awghustqiche bolghan ikki ay ichidiki sétilish miqdari 100 mingdin éship ketken we sina tori élan qilghan eng yaxshi sétilghan aldinqi qatardiki 10 kitabning ichige kirgen. Melum bolushiche xitay oqurmenler, süyiqest témiliri, yuqiri tebiqe emeldarlirigha a'it setchilikler we dramatik tuyghulargha bay eserlerge intayin mayil bolup, bu xil mezmundiki kitablar xitayda intayin téz alqishlinidiken.

Béyjingdiki "goldmen saks" ish béjirish orgini kitab heqqide bir nerse déyishni ret qilghan

Xitay tor betliridiki munazire meydanliridin melum bolushiche, "goldmen saks süyiqesti " namliq kitabning xitayda köplep sétilishi bilen, xitay ishchilirining keng kölemlik ish tashlishi, xitayda yüz bergen kelkün apiti sewebidin yüzminglarche kishining öy ‏- makansiz qélishi sewebidin kélip chiqqan sarasimlar téximu yüksilip, ot üstige yagh chachqandek tesir peyda qilghan. Shundaqla, xitay ijtima'iy jem'iyitide xitay pat yéqinda ghulaydiken deydighan wehime peyda qiliwatqanliqi melum.

Xitayning asaritide yashawatqan Uyghur we tibetlerning, dunyada patmas quyashning yoqluqini, xitayning haman bir küni sabiq sowétler ittipaqidek ghulaydighanliqini ümid bilen jakarlap kéliwatqanliqini bayan qilghan, kanada yashawatqan Uyghur ziyaliysi hashimjan ependi öz qarashlirini otturigha qoydi.

Yuqiridiki awaz ulinishidin, bu heqtiki melumatimizning tepsilatini anglaysiler.
 
 
Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet