Зәһәр падишаһи ху яң билән хитай һөкүмитиниң йеқин мунасивити қизиқ нуқтиға айланди

Австралийиниң сидний шәһиридики сот мәһкимиси 22-июл күни, 250 килограм хроин әткәсчилики билән қолға елинған, австралийә тәвәликигә өткән хитай содигәр ху яң һәм униң шериклири үстидин сот ечип, ху яңға муддәтсиз қамақ җазаси, шериклиригә 18 йиллиқ һәм 15 йиллиқ муддәтлик қамақ җазаси һөкүм қилди.

Бу йил 53 яшқа киргән ху яң 2008-йили 12-март күни өз ширкитидики ваң дән һәм ма йө исимлик икки нәпәр хизмәтчиси билән бир күндә австралийиниң сидний шәһиридә австралийә сақчилири тәрипидин қолға елинған.

Әнглийә б б с агентлиқиниң хәвиридин мәлум болушичә, 2008-йили 4-март күни австралийә таможна хадимлири өй сайманлири қачиланған бир йүк сандуқи ичигә қачиланған хитайда ишләнгән тегүәнйиң маркилиқ10 данә чай қутиси ичидин 250 килограм хироинни байқиған болуп, австралийә сақчилири бу хроинниң әйни чағда 78милйон 500миң австралийә доллири қиммитигә игә икәнликини бекиткән. Сақчилар тәкшүрүш арқилиқ мал игисиниң австралийиниң седний шәһиридики хитай содигәр ху яңниң ширкити икәнликини байқиғандин кейин, ху яң һәм униң шериклирини 2008-йили 11-март күни зәһәр әткәсчилики җинайити билән әйибләп қолға алған. Әйни чағда хәлқара мәтбуатларда бу дело зәһәр әткәсчилики тарихидики 4-чоң хроин әткәсчилики делоси дәп елан қилинған иди.

Ху яң зәһәр әткәсчилики җинайити билән әйиблинип қолға елинғандин буян, ху яңниң хитай мәркизи һөкүмитиниң юқири дәриҗилик әмәлдари ху җинтав қатарлиқлар билән болған пәвқуладдә йеқинлиқ мунасивити һәм униң йеқинқи бирнәччә йилдин буян, австралийиниң юқири дәриҗилик әмәлдарлири билән хитай һөкүмити оттурисидики мунасивәтләрдә тутқан сиясий орни қатарлиқ мәсилиләр хәлқара мәтбуатларниң қизиқ нуқтисиға айланди.

Америка авазиниң ху яң һәққидики хәвиридә дейилишичә,, ху яң 1995-йилдин 2005-йилғичә болған 10 йил ичидә австралийидә 10 нәччә қетим мәдәнийәт сәнәт өмики тәшкилләп, хитайда мәдәнийәт алмаштуруш паалийити уюштурған һәм хитай мәдәнийәт өмәклириниңму австралийидә паалийәт елип беришини уюштурған. Ху яң йәнә австралийиниң юқири қатламдики бәзи әмәлдарлири биләнму  қоюқ мунасивәт орнатқан болуп, хитайниң юқири дәриҗилик әмәлдарлири билән австралийә һөкүмәт әмәлдарлири оттурисидики мунасивәтләрдә әлчилик ролиниму өтигән. Ху яң мушу төһпилири билән 2003-йили 11-айда бейҗиңда хитай рәиси ху җинтавниң биваситә қобул қилишиға еришип, хитайниң мәркизи телевизийә истансиси тәрипидин көп қетим зиярәт қилинған шундақла хитай хәлқ җумһурийити қурулғанлиқиниң хатирә күнидә әзиз меһман сүпитидә мурасимға тәклип қилинған.

Векилекистики ху яң һәққидики учурлардин мәлум болушичә, ху яңниң ширкити җайлашқан бина илгири хитай һөкүмитиниң австралийидә қурған мәлум телевизийә истансисиниң ишханиси болуп, бу бинаға 200 метир арилиқта австралийә бирләшмә сақчи идарисиниң тәкшүрүш ишханиси бар болуп, австралийә сақчи даирилири узун йиллардин буян хитайниң бу телевизийә истансиси һәм ху яңниң ширкитини муһим көзитиш нишанлириниң бири қилған болуп, австралийә сақчи даирилири ху яңниң ширкитиниң хитай билән австралийә оттурисида йөткәп туридиған зор миқдардики банка һесабатиға қарита елип барған узун мәзгиллик тәкшүрүш арқилиқ, униң зәһәр әткәсчилики билән шуғулланғанлиқи һәққидики пакитлар һәм униң келиш мәнбәси ениқ болмиған бәзи тапавәтлири һәққидики учурларни топлиған.

Чәтәлләрдики хитайға қарши тәшкилатлардин фалүнгуң һәм хитай демократлириниң тор бәтлиридә йәнә ху яңниң хитайниң дөләт рәиси ху җинтав билән болған туғқандарчилиқ мунасивити һәққидики хәвәрләрму берилгән болуп, йеңи ира һәм бошүн қатарлиқ тор бәтлиридики хәвәрләрдә ху яңниң хитай рәиси ху җинтавниң җийән оғли икәнлики һәққидики хәвәрләр тарқитилған, бу хәвәрләрдә, ху яңниң австралийигә йәрләшкәндин буян, үзлүксиз һалда хитай коммунист һөкүмитиниң мәнпәити үчүн хизмәт қилғанлиқи һәтта хитай коммунист һөкүмитиниң австралийигә йәрләштүрүлгән җасуслириниң бири болуши мумкинлики һәққидики пәрәзләр илгири сүрүлгән.