Бу йиллиқ «анилар байрими» муһаҗирәттики уйғурлар үчүн қайғулуқ бир күн болди

Мухбиримиз сада
2019-05-13
Елхәт
Пикир
Share
Принт
30 Йил оқутқучилиқ қилған 68 яшлиқ аминә мәмәт «йепиқ тәрбийәләш» мәркизигә қамалған. 2017-Йили ноябир, қәшқәр.
30 Йил оқутқучилиқ қилған 68 яшлиқ аминә мәмәт «йепиқ тәрбийәләш» мәркизигә қамалған. 2017-Йили ноябир, қәшқәр.
RFA/Arslan

Һәр йилда бир қетим тәбриклинидиған хәлқаралиқ «анилар байрими» күни пүтүн дунядики җапакәш аниларниң пәрзәнтлиригә вә аилисигә сиңдүргән әҗри, җәмийәткә қошқан бир кишилик төһписигә миннәтдарлиқ билдүрүлидиған бир байрамдур.

Һәр йили 12-майға бекитилгән бу күндә пәрзәнтләр өз анилириға һәрхил хушпурақ гүлләрни вә совғатларни совға қилиду, меһрибан анисиниң мәңгү шу гүлгә охшаш гүзәл болушини үмид қилип тиләкләрни тилишиду, аниларниң узун өмүр көрүши үчүн дуаларни қилишиду.

Һалбуки, бүгүнки бу мубарәк күн уйғур дияри вә муһаҗирәттики уйғурлар үчүн қайғулуқ бир күн болмақта. Хитайниң уйғур диярида йүргүзүватқан еғир зулумлири нәтиҗисидә муһаҗирәттики уйғурларниң бәзиләр анилириниң авазини аңлаштин мәһрум болған болса, йәнә бәзиләр анисидин мәңгүлүккә айрилип турмақта. Мушу мунасивәт билән муһаҗирәттики уйғурлар һәрқайсий ахбарат васитилири вә иҗтимаий таратқуларда «анилар байрими» һәққидә мақалә вә язмиларни елан қилип, хитайниң җаза лагерлирида азаб чекиватқан анилириниң байримини тәбриклимәктә.

12-Май «зимистан» торида «анилар байримида йоқап кәткән уйғур ана үчүн мураҗиәт» намлиқ бир мақалә елан қилинған. Мақалиниң аптори зиба мурат мәзкур мақалидә хитайниң җаза лагериға соланған аписи гүлшән аббасниң әһвалини мисалға елиш арқилиқ пүтүн дуняни уйғур дияриниң нөвәттики вәзийитигә көз юммаслиққа, хитай һөкүмитиниң уйғур пәрзәнтләрни анисиз қоюшиға йол қоймаслиққа чақирған.

Муһаҗирәттики уйғур паалийәтчилиридин әнглийәдики уйғур зиялийси әзиз әйса әлкүн әпәнди твттер бетигә чаплиған язмисида алақиси пүтүнләй үзүлгән анисиға болған сеғинишини ипадилигән. У мунуларни язған: «анилар байримида мән анамниң авазини аңлиялмаймән, чирайини көрәлмәймән. Мән у тоғрилиқ һечнемини билмәймән. Бүгүн анамға әтиргүл совға қилишқа имкансизмән. Хитайниң лагерлирида азаб чекиватқан уйғур аниларниң байримиға мубарәк болсун!»

Әзиз әйса әпәнди 13-май радийомизға сөз қилип, өзиниң аниси билән алақиси үзүлгәндин кейинки һессиятини сөзләп өтти вә аниси барларниң анисиниң қәдригә йетиши лазимлиқини тәкитлиди.

Вәтәндә хитайниң җаза лагериға соланған, кейин шу йәрдә вапат болған анисиниң әһвалидин кечикип хәвәр тапқан дуня уйғур қурултийиниң рәиси долқун әйса әпәндиму радийомизға сөз қилип, пүтүн уйғур аниларниң байримини тәбриклиди шундақла муһаҗирәттики уйғурларни өз анилири үчүн күрәш қилишқа чақирди.

Мушу қатарда йәнә америкадики «уйғур һәрикити» тәшкилатиниң башлиқи рошән аббас ханимму радийомиз зияритини қобул қилди. У «уйғур һәрикити» тәшкилати намидин хитай һөкүмити тәрипидин айриветилгән ана-балилар, хитай әрлиригә мәҗбурий ятлиқ қилиниватқан вә зорлуққа учраватқан қизлар үчүн бир баянат елан қилғанлиқини тилға алди.

Пикирләр (0)
Share
Толуқ бәт