Алматада тонулған рәссам азад һакимбәкниң көргәзмиси ечилди

Ихтиярий мухбиримиз ойған
2015-12-04
Елхәт
Пикир
Share
Принт
Рәссам азад һакимбәкниң көргәзмиси
Рәссам азад һакимбәкниң көргәзмиси
RFA/Oyghan

2 - Декабирда алматада әбилхан қастейеф намидики дөләт сәнәт музейида қазақистанниң хизмәт көрсәткән сәнәт әрбаби, кона асарә - әтиқиләрни топлиғучи, атақлиқ рәссам азад һакимбәкниң «уйғур маддий сәнитиниң топлими» мавзусида нөвәттики көргәзмисиниң ечилиш мурасими болуп өтти. Көргәзмини ачқан мәмликәтниң көрнәклик рәссами нуразхан еркин меһманларни а. Һакимбәкниң иҗадийити, көргәзмигә қоюлған әсәр вә буюмларниң мәзмун вә тарихи билән тонуштурди. Сөзгә чиққан мәзкур музей мудириниң илмий ишлар бойичә орунбасари ефрат мамбетоф, музей йенидики «қазақистан тәсвирий сәнити» илмий мәркизиниң йетәкчи илмий хадими камилла ли, филология пәнлириниң намзати рабик исмайилоф, қазақистанниң сабиқ сенатори марс батталоф вә башқилар а. Һакимбәкниң иҗадийити һәққидә өз пикирлирини оттуриға қойди. Андин сөз алған а. Һакимбәк өзиниң бу қетимқи көргәзмисиниң алаһидилики һәққидә тохтилип, кәлгүчиләргә өзиниң миннәтдарлиқини изһар қилди.

А. Һакимбәк радийомиз зияритини қобул қилип, мундақ деди: «мениң бу топламни йиққинимға топ - тоғра 45 йил бопту. 1971 - Йили башлиған. Мана бүгүнки көргәзмә 35 - көргәзмә. Униң ичидә қазақ қол һөнириму бар. Мана түнүгүн астанида бизниң президент нурсултан назарбайеф қазақистанниң тарихида биринчи қетим һәрбий музейни ачти. Уни мудапиә министири тасмағамбетоф уюштурған. У икки айниң ичидә тәйяр болди. Шу тасмағамбетофниң илтимаси билән 80 данә қорал - ярақларни мән әнә шу музейға вақитлиқ бәрдим. Униң ичидә кона хәнҗәрләр, қиличлар, тапанчилар, милтиқлар бар. Мениң нурғун нәрсилирим шу йәрдә қоюлди. Униңдин ташқири қолумда улуқ қазақ рәссами әбилхан қастейефниң сүрәтлири бар. Уларниң арисида уйғур, өзбек, қирғиз, советниң атақлиқ рәссамлириниң сүрәтлириму бар. Қолязма топлимимда 9 - , 12 - , 20 - әсирләргә аит кона қолязмилар бар. Униң ичидә қәшқәр, түркистан, бухара, сәмәрқәнт, йәкән шәһәрлиридә йезилған қолязмиларму бар.»

А. Һакимбәкниң ейтишичә, униң топлими қазақистандин ташқири йәнә азәрбәйҗан, японийә, фирансийә, венгрийә, қирғизистан охшаш мәмликәтләрдиму намайиш қилинған. А. Һакимбәкниң қиливатқан ишлири, мәсилән, профессор абдуллам самсақофниң тәкитилишичә, уйғур миллий маддий сәнитини башқиму хәлқләргә тонуштурушта муһим рол ойнайду. У а. Һакимбәкниң топлимиға киргән асарә - әтиқиләрниң тарихий әһмийитигә юқири баһа берип, мундақ деди: «азад һакимбәкниң бу топлиминиң 7 - әсирдин 19 - әсиргичә дәп йезилғанлиқи мени наһайити қизиқтурди. Көргәзмидә адәмни бирдин җәлб қилидиған нәрсә, йоған икки залға униң йиққан топлими сиғмай турупту. Бу йәрдә гиләм, лахшигир, кийим - кечәк, һәр түрлүк рәсимләр, қәдимий дәвиргә тәәллуқ лайдин ясалған һәйкәлләр бар. Бу йәрдә етибар беридиған нәрсә, мустәқил дөләтләр һәмкарлиқи тәвәсидә азад һакимбәктәк мәдәний мирасларни йиққан адәм йоқ. Чегриниң у йеқида, ана йеримиздиму а. Һакимбәктәк топлам йиғиватқан адәмни бар, дәп мән аңлимиған. Демәк, азад бир мәмликәтниң қилидиған ишини өз бойниға елип қилди, десәм артуқчилиқ кәтмәйду. Биз униңға дайим рәһмәт ейтип, шуниң қәдриниму билишимиз керәк.»
Алматада тонулған рәссам азад һакимбәкниң көргәзмиси ечилди

А. Самсақофниң бу пикрини қоллиған қазақистанлиқ рәссам, язғучи, сәнәтшунаслиқ пәнлириниң намзати һакимҗан гулийефму а. Һакимбәктәк мундақ уйғур мәдәний асарә - әтиқилирини топлап, уларни тәшвиқ қиливатқан шәхсләрниң йоқниң орнида екәнликини көрсәтти вә болупму гиләмләргә алаһидә диққәт қилғанлиқини ейтип, мундақ деди: «бу йәрдә барлиқ саһәләрни өз ичигә алған буюмлар қоюлған. Рәссам сүпитидә көзүмгә челиққини гиләмләр. Көргәзмигә 40 тин ошуқ гиләмләр қоюлған. Биз билимиз, гиләм тоқуш саһәсидә уйғурлар, асасән, хотән тәвәсидә наһайити чоң утуқларға йәткән. Хотән гиләмлири дуня йүзидә наһайити яхши баһа алди. Шундақла яғаччилиқ сәнити, төмүр билән безәш усуллири, кулалчилиқ, музикилиқ әсваплар, наһайити устилиқ билән ишләнгән әсваплар, қәдимий өй җабдуқлири көргәзмигә қоюлған. Бу йәрдә а. Һакимбәкниң әмгики наһайити зор. Һәқиқәтән өзиниң барлиқ хираҗитини көргәзмигә сәрп қилған топлиғучи. Униң мәқсити бизниң юқири пәллидики мәдәнийитимизни сақлап қелип, кейинки әвладларға қалдуруш. Шуниң үчүн а. Һакимбәккә биз уйғурлар, пәқәт апирин, рәһмәт дейишимиз керәк.»

Пикирләр (0)
Share
Толуқ бәт