Bilal Uyghurning “Erkinlik marshi” yürüshining netijisi boldimu?

Kanadadiki Uyghurlardin bilal malik Uyghur kanada bash ministirigha özining telep xétini yetküzüsh üchün 2021-yili 7-ayning 4-küni toronto shehiridin yolgha chéqip, kanadadiki 10 nechche sheherdin piyade méngip ötüp, 7-ayning 19-küni paytext ottawagha yétip barghanidi.

Eyni waqitta radiyomiz bu heqte tepsiliy melumat bergenidi. Bilal shu waqitta 500 kilométirgha yéqin yolni piyade méngip, özining töt türlük telipi yézilghan mektupni bash ministir ishxanisigha yetküzgenlikini éytqanidi. Mektuptiki töt türlük telep munular idi: birinchi, kanada parlaménti alghan Uyghur irqiy qirghinchiliq qararini kanada hökümitining resmiy étirap qilishini telep qilish؛ ikkinchi, kanada hökümiti bu qarargha qarita resmiy heriket qollinish. Üchinchi, kanada olimpik komitéti béyjing qishliq olimpik musabiqisini bayqut qilish؛ tötinchi, türkiyede turuwatqan Uyghur panahliq tiligüchilerni kanadagha yerleshtürüsh.

Bilal bu piyade yol méngish herikitini “Erkinlik marshi” dep atighan bolup, kishilerning xitay hakimiyitining Uyghurlargha yürgüzüwatqan zulumliri heqqidiki tonushini östürüshni meqset qilghaniken. Bilalning bu 15 künlük piyade sepiri heqqide “Qadaq basqan qanliq yol” (Blistered Bloodlines) namliq bir höjjetlik filimmu ishlen'gen iken. Korona wabasi tüpeyli bu filimni ishlesh we tarqitish ishliri keynige sürülgen bolup, yéqinda bu höjjetlik filim chong-kéchik féstiwallarda qoyulushqa bashlighan.

Biz bilalning 15 kün jeryanida putlirining qadaq bésip ketkinige qarimastin, 500 kilométir yolni piyade bésip bash ministirgha yetküzgen xétining netijisini bilip béqish üchün uning bilen qayta alaqileshtuq.

U ziyaritimiz jeryanida eyni waqittiki japaliq 15 künlük seperdin kéyinki netijilerni sözlesh bilen bir waqitta, seper jeryanida yerlik xelq rayonlirining biride yüz bergen bekmu tesirlik bir weqeni eslep ötti. Emma bu weqe eyni waqitta höjjetlik filimgha élinmay qalghan iken.

Söhbitimizning tepsilatini yuqiridiki ulinishtin anglighaysiler.