Японийәдә илһам тохтиға беғишланған твитер тори намайиши давам қилмақта

Ихтиярий мухбиримиз һаҗи қутлуқ қадири
2014.01.20
turmemet-ilham-toxti-twitter.jpg Японийәдики уйғур зиялийси доктор турмуһәммәт һашим өзиниң 15 миңдин ошуқ әзаси болған твитер тор бетидә илһам тохтиниң балдуррақ қоюп берилишини тәләп қилип, твитер тор бекитидә қилған намайиши.
Twitter

15-январ хитай даирилири бейҗиңдики өктичи уйғур зиялийси илһам тохтини тутуп кәткәнлики ашкариланғандин кейин, японийәдики уйғур зиялийси доктор турмуһәммәт һашим өзиниң 15 миңдин ошуқ әзаси болған твитер тор бетидә 17-январдин башлап илһам тохтиниң балдуррақ қоюп берилишини тәләп қилип, твитер тори намайишини башлиған.

Зияритимизни қобул қилған, мәзкур намайишқа актип аваз қошуватқан қануншунас ямагаҗо твитер торидики намайиш арқилиқ илһам тохтиниң хитай даирилири тәрипидин тутуп кетилгәнликини вә униң илгириму америкиға меңиш сәпиридә бейҗиң айродромида тосқунлуққа учриғанлиқидин хәвәрдар болғанлиқини билдүрди.

Бу қетимқи твитер тори намайиши “дотсент илһам тохтиниң тиздин қоюп берилишини тәләп қилиш уюшмиси” дегән сөзни ачқучлуқ сөзләр қилип, твитер вә фейсбук арқилиқ японийә вә дуняниң һәр қайси җайлиридики инсанпәрвәр кишиләрдин илһам тохтиниң мәсилисигә йеқиндин көңүл болушини тәләп қилған.

Бир қанчә күндин буян давамлишиватқан бу твитер тори намайишиға нурғунлиған кишиләр йеқиндин аваз қошуп өзлириниң илһам тохтиға болған һесдашлиқини билдүргән.

Твитер тори намайишиға иштирак қиливатқан тордашлардин ракуан окомескй исимлик тордаш илһам тохтиниң зорлуқ билән тутуп кетилгәнликигә наразилиқ билдүрүп мундақ инкас қалдурған: “хитай һөкүмитиниң уйғурларға болған позитсийиси ғәйрий болуватиду. Сан-санақсиз бастурушлар, көп қетимлиқ атом бомбиси синақлири, уйғурларниң тупрақлирини булаш, һәрхил баһанә-сәвәбләр билән адәм өлтүрүш, бу наһәқчиликкә қарши чиққан инсан һәқлири паалийәтчилирини тутуп қамап қоюш қатарлиқларниң һәммиси һазирқи заманда қобул қилғили болмайдиған интайин ғәйрий ишлар. Мән илһам тохтиниң дәрһал қоюп берилишини тәләп қилимән.”

Ундин башқа йәнә, киноко исимлик тордаш өз һессиятини баян қилип мундақ инкас қалдурған: “хитай компартийисидики кишиләргә демәкчимәнки, һазир 21-әсир, җуңхуа хәлқ җумһурийити дунядики иккинчи чоң иқтисади зорайған мәмликәт. Мәдәнийәт зор инқилаби аллиқачан ахирлашти. Инсанларниң сөз қилишини чәкләш номус.

Көплигән тордашлар; “уйғурларниң мустәқил болушини қоллаймән. Хәлқләрни халиғанчә бастуруп, зәһири дуняға чечиливатқан хитай компартийиси илһам тохтини дәрһал қоюп бериши керәк” дегәндәк инкасларни қалдурған.

Мәзкур твитер тори намайишиға иштирак қиливатқан йокояма ханим телефон зияритимизни қобул қилип мундақ деди:

-Мән илһам тохтиниң тутуп кетилгәнликигә толиму әпсусландим. Илһам тохти бир тәтқиқатчи, униң мақалилири пәқәтла уйғурлар тоғрисидики тәтқиқат мақалилири болуп, униң мақалилиридә хитай һөкүмитигә қарши һечқандақ мәзмун йоқ. Хитай һөкүмити буни чоңқур ойлинип көрсә болиду.

Твитер тори намайиши 17-январ башланған болуп, игилишимизчә бу намайиш илһам тохти қоюп берилгүчә давамлишидикән.

Ахирида биз, мәзкур намайиш һәққидә бәзи учурларға игә болуш үчүн, намайишни уюштурғучи доктор турмуһәммәт һашим билән телефон сөһбити елип бардуқ.

Аваз улинишидин тәпсилатини аңлаң.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.