Kanadaning montré'al shehiridiki Uyghur baliliriningmu ana til mektipi boldi

23-Mart küni kanadaning montré'al shehiridiki Uyghurlar, bolupmu ata-ana we balilargha bekmu ehmiyetlik we xushalliq bir kün boldi.

Montré'al Uyghur jem'iyitining orunlashturushi bilen ötküzülgen shenbe künidiki noruz bayrimini qutluqlash pa'aliyitide, Uyghur ana til mektipining resmiy échilghanliqi jakarlandi. Mezkur Uyghur ana til mektipining hazir oqughuchi sani 30 din ashqan bolup, kéler heptidin bashlap her hepte axiri balilargha muntizim halda Uyghur tili, Uyghur muzikisi, güzel sen'iti we islam dinidin dersler ötülidiken.

Ötken shenbe küni kanadaning montré'al shehiridiki 100 din köprek Uyghur bayramliq kiyimliri we Uyghur doppalirini kiyip montré'al Uyghur jem'iyiti uyushturghan noruz pa'aliyitide jem bolghan. Bu pursette montré'al Uyghur jem'iyitining re'isi nurmuhemmet ependi jama'etning noruz bayrimini qutluqlighandin kéyin yene jem'iyet ezalirining, bolupmu japakesh, pidakar mu'ellimlerning bir qanche yilliq tirishchanliqi we teyyarliqi arqisida, Uyghur jama'iti arzu qilip kelgen montré'al Uyghur ana til mektipining resmiy échilghanliqini xushalliq bilen jakarlighan.

Montré'al ana til mektipining mudiri mexmutjan imin mektepning échilghanliqining ata-ana we balilarni bekmu xushal qilghanliqini bildürdi. Uning tonushturushigha qarighanda, yéqinqi yillarda montré'al kanadadiki Uyghurlar bir qeder zich jaylashqan sheherlerning birige aylinip, jama'etning köpiyishige egiship ewladlarning öz Uyghur ana tili we Uyghur medeniyitini saqlashta muntizim bir terbiyege bolghan éhtiyaji kücheygen bolsimu, biraq türlük qiyinchiliqlar seweblik ana til mektipi muntizim dawamlishalmighan iken.

Nöwette mezkur mektepning muqim ders ötidighan töt neper oqutquchisi bar bolup, rida ablimit ependi bu ana til mektipining ilmiy mudirliq wezipisini üstige alghan iken. U özining؛ “Bu mektep montré'aldiki Uyghur jama'iti üchün chong bir boshluqni tolduridu” dégen ishenchte ikenlikini bildürdi.

Montré'al Uyghur mektipining ana til oqutquchiliridin medine abdusattar mu'ellim ziyaritimizni qobul qilip, Uyghur perzentlirini terbiyelesh pursitini sherep dep bilidighanliqini ipadilidi. Medine mu'ellimning tonushturushiche, mezkur Uyghur ana til mektipining hazir oqughuchi sani 30 din ashqan bolup, kéler heptidin bashlap her hepte axiri balilargha muntizim halda Uyghur tili, Uyghur muzikisi, güzel sen'iti we exlaq hemde islam dinidin dersler ötülidiken.

Özliriningmu ana til mektipi bolghanliqidin shadlan'ghan bir qisim balilar arqa-arqidin öz xushalliqi we arzulirini ana tilida ipadileshti.

Mezkur ana til mektipining échilghanliqini mubareklep bashqa döletlerdiki Uyghur ana til mektepliri oqutquchi-oqughuchiliri we Uyghur jem'iyet hem teshkilat rehberlirimu arqa-arqidin, süretlik hemde awazliq tebriknamilirini yollighan shuningdek özlirining ümidlirini we qollishini izhar qilishqan.

Hazir xitay hökümiti Uyghur diyarida Uyghurlarning tili we ma'aripini cheklesh siyasetlirini yürgüzüwatqan bir peytte, Uyghur tili we medeniyitini saqlap qélishni özining burchi dep bilgen muhajirettiki Uyghurlar bolsa bu xildiki ana til mekteplirini échishni özlirining eng muhim xizmetliri qatarigha qoymaqta. Yéqinqi yillarda amérika we yawropa döletliri we türkiyediki Uyghurlar yashawatqan bir qisim sheherlerde ana til mektepliri échilghandin bashqa, her qaysi döletlerdiki Uyghur ma'aripchi we ziyaliylarning ortaq küch chiqirishi bilen, bu Uyghur ana til mekteplirining bir tutash oqush matériyalliri we hetta mektep formilirighiche birlikke kéliwatqanliqi melum.