Нәнси пелосиниң тәйвән зияритиниң уйғурлар билән немә алақиси бар?

Ихтиярий мухбиримиз әкрәм
2022.08.03
Share on WhatsApp
Share on WhatsApp
Нәнси пелосиниң тәйвән зияритиниң уйғурлар билән немә алақиси бар? Америка авам палатасиниң рәиси нәнсий пелоси ханим д у қ ниң “демократийә мукапати” алғанлиқини тәбриклиди. 2019-Йили 4-июн, вашингтон.
RFA/Ekrem

Америка авам палатасиниң рәиси нәнси пелоси ханимниң 2-авғуст башланған тәйвән зиярити бүгүн дуня ахбарат саһәсиниң әң қизиқ вә әң муһим темилиридин биригә айланди. Хитай һөкүмити нәнси пелоси ханим тәйвән зияритини башлаштин илгирила америка һөкүмитигә бесим ишлитип: “от билән ойнашмаслиқ” ни, нәнси пелоси ханим тәйвәнни зиярәт қилса “интайин яман ақивәт пәйда қилиду” ғанлиқини, хитай азатлиқ армийәсиниң “қарап турмайду” ғанлиқини ейтип тәһдит салған. Хитай йәнә тәйвән боғузи әтрапини қамал қилип, һәйвәтлик маневирларни өткүзүп, гоя тәйвәнни бирқанчә саәт ичидила бесивалидиғандәк яки нәнси пелоси ханим тәйвән зияритини бикар қилмиса, америкаға қарши җәң елан қилидиғандәк терә тарақшитқан, хитай дөләт таратқулириниң бу хусуста тарқатқан син көрүнүшлири һәқиқәтәнму бир мәйдан урушниң шәписини көрсәткән.

Бирақ нәнси пелоси ханим хитайниң бу тәһдитлиригә бипәрва һалда тәйвәнни зиярәт қилғандин кейин, пүткүл ахбарат вастилири хитайниң көрсәткән һәйвилири билән американиң көрсәткән җасаритини селиштуруп, ши җинпиң һөкүмранлиқидики хитайниң бу қетим наһайити мәсхирилик бир һалға чүшүп қалғанлиқини баян қилишқан. Хитай болса тәйвән әтрапидики 6 районда маневирни давам қилип, һазирчә “америка бу хаталиқи үчүн еғир бәдәл төләйду” дейиш билән чәкләнгәндәк.

Дуня парламент әзалириниң 8-қетимлиқ тибәт йиғинида (оңдин) д у қ рәиси долқун әйса, авам палатасиниң рәиси нәнси пелоси(Nancy Pelosi), “уйғур һәрикити” тәшкилатиниң башлиқи рошән аббас ханим вә UHRP ниң директори өмәр қанат әпәнди.
Дуня парламент әзалириниң 8-қетимлиқ тибәт йиғинида (оңдин) д у қ рәиси долқун әйса, авам палатасиниң рәиси нәнси пелоси(Nancy Pelosi), “уйғур һәрикити” тәшкилатиниң башлиқи рошән аббас ханим вә UHRP ниң директори өмәр қанат әпәнди.

Бу һал хитайниң ичкий қисмида яшаватқан милләтчи хитай пуқралириғиму тәсир көрсәткән. Иҗтимаий таратқуларни бүгүн бәзи хитайларниң өз һөкүмитини әйиблигән, өзлирини качатлиған, йиғлиған, зарлиған көрүнүшлири қаплап кәткән. Буниң әксичә, нәнси пелоси ханимниң тәйвән зиярити уйғурларниңму күчлүк диққитини қозғиған, хитайни осал әһвалға чүшүрүп қойған бу вәзийәт муһаҗирәттики уйғурларни сөйүндүргән. Уйғурлар “ши җинпиңниң йүзигә урулған шапилақ” тоғрисида иҗтимаий таратқуларда бәс-бәстә пикирләр баян қилишни давамлаштурған. Ши җинпиңниң образиға мунасивәтлик һәрхил һәҗивий рәсимләрни елан қилип, өзлириниң хушаллиқлирини намайән қилишқан.

Нәнси пелоси ханимниң тәйвән зияритиниң уйғурлар билән немә алақиси бар? уйғурларниң буқәдәр хушал болушидики сәвәб немә?

Иҗтимаий таратқулардики учурларда тилға елинишичә, нәнси пелоси ханим тәйвән зиярити арқилиқ биринчидин, хитай дөлитиниң һәйвисини қаттиқ йәргә урған, иккинчидин, милйонлиған қериндашлирини җаза лагерлириға вә түрмиләргә соливалған “мустәбит хитайниң йүзигә урулған бу шапилақ” уйғурларниң өчини елип бәргәндәк болған, үчинчидин, бу зиярәт тәйвән мустәқиллиқиниң дәсләпки қәдими болуп, келичәктики шәрқий түркистанниң мустәқиллиқи үчүнму пайдилиқ икән.

Д у қ рәиси долқун әйса әпәнди бу һәқтә зияритимизни қобул қилғанда, нәнси пелоси ханимниң тәйвән зияритиниң уйғурларғиму үмид беғишлайдиған, уйғурларниму җасарәтләндүридиған бир һәрикәт болғанлиқини тилға алди.

2-Авғуст күни уйғур һәрикити тәшкилати нәнси пелоси ханимниң тәйвән зияритини қоллап баянат елан қилған болуп, мәзкур тәшкилатниң рәиси рушән аббас ханим 29-июл нәнси пелоси ханим билән көрүшүп, уйғурлар мәсилиси тоғрисида сөһбәт елип барған иди. У бүгүн бу һәқтә зияритимизни қобул қилғанда, нәнси ханимниң тәйвән зияритиниң бирқанчә чоң нәтиҗисини тилға елип өтти.

Уйғурлар мәсилисигә изчил көңүл бөлүп кәлгән вә уйғурларниң нәзәридә яхши образ яратқан нәнси пелоси ханимниң тәйвән зияритидә уйғурлар мәсилисини тилға елишни унтуп қалмиғанлиқини илгири сүргән д у қ муавин рәиси пәрһат муһәммиди әпәнди, американиң уйғурлар тоғрисидики қанунларни мақуллишида нәнси пелоси ханимниң төһписиниң зор болғанлиқини тәкитлиди.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.