Қазақистандики уйғур җамаити бу йиллиқ роза һейтни вәтәнгә болған үмид-ишәнчләр билән қутлиди

Ихтиярий мухбиримиз ойған
2019-06-06
Елхәт
Пикир
Share
Принт
Алмута шәһириниң уйғурлар зич олтурақлашқан достлуқ мәһәллисидики һейт намизидин көрүнүш. 2019-Йил 5-июн, алмута.
Алмута шәһириниң уйғурлар зич олтурақлашқан достлуқ мәһәллисидики һейт намизидин көрүнүш. 2019-Йил 5-июн, алмута.
RFA/Oyghan

Нопус җәһәттин бир қәдәр көп болған, бир йүрүш ана тилдики мәктәплиригә, кәспий тиятирлириға вә мәтбуатиға игә болған қазақистанлиқ уйғурлар 5-июн күни бу йиллиқ роза һейт байримини күтүвалди.

Муһаҗирәттики уйғурлар бу йиллиқ роза һейтни уйғур елидә диний чәклимиләр әң күчәйгән, бигунаһ хәлқ җаза лагерлириға қамалған, хитай һөкүмити уйғур вә башқа түркий хәлқләрни милләт сүпитидә йоқитишқа урунуватқан бир мәзгилдә күтүвалди.

Бу күни уйғурлар зич олтурақлашқан қазақистанниң барлиқ шәһәр вә йезилардики мәсчидләрдә һейт намизи оқулуп, мусулманлар бир-бирини тәбрикләшти. Мәмликәтниң көплигән мәтбуат сәһипилиридә қазақистан рәһбәрлириниң рози һейт байрими мунасивити билән сөзлигән тәбрикнамилири елан қилинди.

«Еһсан» журнали тәһриратиниң хадими сәдирдин аюпофниң ейтишичә, қазақистанлиқ уйғурлар бу йили 30 күн мабайнидә хатирҗәм роза тутуш, ибадәт қилиш мумкинчиликигә игә болған. Қазақистан һөкүмити тәрипидин кәң даиридә ярдәмләр берилип, мәсчидләрдә вәз-нәсиһәтләр ейтилған, адәмләргә розиниң муһимлиқи чүшәндүрүлүп, тәшвиқатлар меңип турған икән.

Сәдирдин аюпоф бүгүнки күндә уйғур елидә вәзийәтниң интайин җиддийликини, уйғур хәлқиниң рози һейтни хитайға болған үнсиз қаршилиқ ичидә өткүзгәнликини баян қилди.

Тонулған язғучи абдухалиқ мәһмудоф өзиниң уйғур елидә өткән балилиқ дәврини, шуниң билән биргә уйғурлар вәтинидә илгири роза һейтниң қандақ қутлинидиғанлиқини әсләп өтти.

Униң дейишичә, уйғурлар коммунист хитай йүргүзгән сиясәтләр түпәйли нөвәттә роза һейт, қурбан һейтқа охшаш диний байрамларни тәқиб астида өткүзүшкә мәҗбур болмақтикән. У йәнә өзиниң 1963-йили ғулҗидин совет иттипақиниң қазақистан иттипақдаш җумһурийитигә көчүп чиққанлиқини, әмма у йилларда совет иттипақидики түркий хәлқләрниң уйғур елидикигә охшаш роза һейтни тәнтәнилик өткүзгәнликини көрүп бақмиғанлиқини тәкитләп өтти.

Пикирләр (0)
Share
Толуқ бәт