200 Ming kadir qandaq arqa körünüsh we meqsette “Töwen” ge chüshürüliwatidu?

Uyghur élida 2014 - yilidin étibaren 200 ming kadirning asasiy qatlamgha seperwer qilin'ghanliqi melum.

Ehwaldin xewerdar kishilerning radiyomizgha bildürüshiche, da'irilerning “Töwen'ge chüshürüsh” namida yéza - kentlerni merkez qilghan asasiy qatlamgha xizmet guruppilirini ewetish ishi emeliyette 2012 - yilidin bashlan'ghan iken.

Melum bolushiche, Uyghur aptonom rayonluq partkom 2012 - yili ürümchi tewesidin jem'iy 485 neper kadirni tallap asasiy qatlamgha ewetken. Shu yili “Töwen” ge kadir ewetishning témisi “Asasiy qatlamgha chongqur chöküp, istil tüzitish” déyilgen. 2013 - Yili “Töwen'ge chüshüp xelq turmushini yaxshilash we namratliqni tügitish” dégen nam bilen asasiy qatlamgha kadir ewetilgen. 2014 - Yiligha kelgende asasiy qatlamgha ewetilidighan kadirlarning sani biraqla yoqiri kötürülgen. Témisi “Asasiy qatlamgha chongqur chöküp, el rayini qolgha keltürüsh” dep özgertilgen.

Bu heqte ziyaritimizni qobul qilghan Uyghur yash özining buningdin ikki yil ilgiri “Asasiy qatlamgha ewetilgen bir kadir” ikenlikini, bu heqtiki ehwallardin toluq xewerdar ikenlikini bildürdi.

Uning bildürüshiche, 2012 - yilidin bashlan'ghan asasiy qatlamgha yoqiridin xizmet guruppisi ewetish xizmiti 2014 - yiligha kelgende pütün aptonom rayon miqyasidiki zor heriketke aylan'ghan. Gerche her yili “Töwen” ge kadir ewetishning sho'ar we chaqiriqliri özgirip tursimu, lékin uning eng muhim meqsiti “Muqimliqni saqlash” iken.

“Töwen” ge ewetilgen xizmet guruppisidiki kadirlar özliri turushluq yéza yaki kentlerdiki yerlik ahaliler bilen biwasite uchriship, ulargha “Muqimliq” heqqide teshwiqat élip baridiken. Yerlik da'iriler bilen hemkarliship xitay hökümitining Uyghur éligha qaratqan siyasetlirini emeliyleshtürüsh üchün küch chiqiriken.

Uning körsitishiche, aptonom rayonluq partkom “Töwen” ge xizmet guruppisi ewetishte aldin bilen “Nuqtiliq nahiye”, “Nuqtiliq rayon”, “Nuqtiliq yéza” yaki “Nuqtiliq kent” dégendek siyasiy jehettin eng sezgür, weqe köp chiqidighan jaylarni asas qilidiken. Yoqiridin ewetilgen kadirlarmu asasliqi bu xildiki “Nuqtiliq” jaylargha ewetilidiken.

Uyghur aptonom rayonluq partkom teshkilat bölümi “Töwen” ge ewetilidighan kadirlarni tallashta xitay kadirlargha “Qosh tilliq” bolushni, Uyghur kadirlargha “Partiye ezasi” bolush yaki “Siyasiy jehettin ishenchilik bolush” ni muhim shert qilidiken.

Undin bashqa, “Töwen” ge ewetilidighan kadirlarning kelgüside “Östürülüsh obéykti” bolidighanliqi aldin'ala eskertidiken. Ular asasiy qatlamdin qaytip kelgendin kéyin köpinchilirining derijisi ösidiken yaki ma'ashi örleydiken we yaki unwani kötürülidiken.

“Töwen” ge ewetilidighan kadirlar aldi bilen aptonom rayonluq partiye mektipide mexsus siyasiy we nezeriye jehettin terbiyelinidiken. Ular aptonom rayonluq partkom teshwiqat bölümi tallap chiqqan “Siyasiy aktiplar” larning léksiyelirini anglaydiken. Halbuki, ular asasiy qatlamgha ewetilish aldida “Töwen” diki barliq xizmetlerni élip bérishta choqum yerlik partkom we xelq hökümetliri bilen maslishishi lazimliqi eskertilidiken.

Tepsilatini awaz ulinishtin anglighaysiz.