Xitay mutexessisi türkiyeni térrorizmgha qarshi küreshte ikki bisliq siyaset yürgüzüwatidu, dep eyiblidi

Shangxey xelq'ara uniwérsitéti ottura sherq instituti mudiri jow wéylyé, enqere poyiz istansisi aldida 97 kishi qaza tapqan térrorluq hujum toghrisida xitay axbaratigha bayanat bérip, türkiyening térrorizmgha qarita ikki bisliq siyaset yürgüzüwatqanliqini ilgiri sürgen.

“http://www.mansethaber.com” tor gézitide élan qilin'ghan xewerde, jow wéylé, enqerede yüz bergen térrorluq hujum heqqide muxbirlargha bergen bayanatida, “Türkiye térrorizmgha qarshi küreshte ikki bisliq siyaset élip bériwatidu” dédi. U, bayanatida, türkiyening térrorizmgha qarshi küreshte müjmel siyaset élip bériwatqanliqini, deméshiq-iraq islam döliti térroristlirigha qarshi turuwatqandek körünsimu, emeliyette kurtlerning küchlinishige qarshi bir siyaset élip bériwatqanliqini bayan qilghan.

Bulardin bashqa xitay dölet axbarat orgini bolghan shinxu'a xewer agéntliqi türkiyening térrorizmgha qarshi siyasitini tenqid qilghan bir obzor élan qildi. “Türkiye ikki bisliq siyasiti tüpeylidin térrorizmning qurbani boldi” serlewhilik maqalide, ikki milyon musapir yashawatqan türkiyedin süriyege demeshq iraq islam döliti térroristlirining ötüp kétish éhtimalining küchlük ikenlikini bayan qilin'ghandin kéyin, tereqqiy qiliwatqan türkiye jumhuriyitining tereqqiy qilghan amérikigha oxshash döletlerge qarighanda térrorizmdin köprek ziyan tartidighanliqi bayan qilin'ghan.

Maqalidiki analizda, türk hökümiti, térrorluq hujumgha térrorizm uruqi chachqan teshkilatlargha qarita ikki bisliq siyaset élip barghanlarning axirida özlirining ziyan tartidighanliqini unutmasliqi kérekliki bayan qilin'ghan. Maqalide türkiyening ikki bisliq siyasitini közdin köchürüshi kéreklikini, gherb döletliridin sirt pütün döletler bilen térrorizmgha qarshi küreshte hemkarlishishi kérekliki ilgiri sürülgen.

Biz bu heqte köz qarishini élish üchün türkiye qehriman marash uniwérsitéti oqutquchisi dr. Alimjan bughra we dunya Uyghur qurultiyining sabiq re'isi enwer jan ependiler bilen söhbet élip barduq.

Dr. Alim jan bughda shinxu'a xewer agéntliqida élan qilin'ghan maqalide türkiyening térrorgha qarshi küreshte ikki bisliq siyaset élip bardi dep qarilighanliqini, emeliyette türkiyening undaq bir siyasitining mewjut emeslikini éytti.

Enwer jan ependi xitay bundaq déyish arqiliq türkiyening qérindash mezlum Uyghurlargha bolghan hésdashliqini tosushqa tirishiwatqanliqini éytti.