Xelq'araliq oqughuchilar ilmiy muhakime yighinida Uyghur oqughuchilar toghrisida söz qilindi

Ixtiyariy muxbirimiz arslan
2015-11-09
Élxet
Pikir
Share
Print
Xelq'araliq oqughuchilar ilmiy muhakime yighinidin körünüsh. 2015-Yili 6-noyabir, türkiye.
Xelq'araliq oqughuchilar ilmiy muhakime yighinidin körünüsh. 2015-Yili 6-noyabir, türkiye.
RFA/Arslan

Xelq'ara oqughuchilar jem'iyetliri fédératsiyesi bilen türkiye yildirim beyazit uniwérsitétining birlikte uyushturushi bilen xelq'araliq oqughuchilar ilmiy muhakime yighini 11-ayning 6-kündin 8-künigiche istanbulda échildi.

Xelq'araliq oqughuchilar ilmiy muhakime yighinigha dunyaning oxshimighan jayliridin onlighan akadémik tetqiqatchilar, doktor, proféssorlar, ammiwi teshkilat rehberliri türkiyede oquwatqan chet'ellik oqughuchilar bolup köp sanda kishi qatnashti.

Bu yighin'gha Uyghurlargha wakaliten yildirim beyazit uniwérsitétining oqutquchisi proféssor doktor abdurréshit qarluq, sherqiy türkistan ma'arip we hemkarliq jem'iyitining re'isi hidayetullah oghuzxan, Uyghur ziyaliy abdul'eziz beshtoghraq, mirkamil qeshqerli we türkiyede oquwatqan bir qisim Uyghur oqughuchilar qatnashti.

Yighinining échilish murasimida xelq'ara oqughuchilar jem'iyetliri fédératsiyesining re'isi mehmet polat ependi, proféssor doktor mehmet barzha, yildirim beyazit uniwérsitétining mudiri proféssor métin doghan, i ha ha insaniy yardem fondining re'isi bulent yildirim ependiler échilish nutqi sözlidi.

Yighinda proféssor doktor abdurréshit qarluq ependi, "Xelq'ara oqughuchi terbiyileshte xitay-türkiye tejribiliri" dégen témida söz qildi we ikki oxshimaydighan döletning chet'ellik oqughuchilarni oqutush tejribilirini sélishturup türkiyening xelq'ara oqughuchi tejribilirining téximu toluqlinishi üchün teklip-pikirlerni otturigha qoyghan.

Xelq'ara oqughuchilar jem'iyetliri fédératsiyesining re'isi mehmet polat ependi, bu ilmiy muhakime yighinining meqsiti toghrisida toxtilip mundaq dédi: "Meqsitimiz, dunyaning oxshimighan jaylirida oxshimighan jughrapiyelerde xelq'ara oqughuchilargha alaqidar xizmet-pa'aliyetler élip bériwatqan ammiwi teshkilatlar, oqughuchilar uyushmiliri, uniwérsitétlar, akadémik organlarning munasiwetlik mes'ulliri bilen tejribe almashturush, xelq'ara oqughuchilarning oqush pa'aliyetlirige hesse qoshidighan bir aliy organ tesis qilish, oqughuchilarning oqush shara'itini qulaylashturush üchün her qaysi döletlerdiki oqughuchi ishliri ammiwi teshkilatlar bilen hemkarlishish toghrisida muzakire qilish we pikir-almashturushtin ibaret."

Xelq'ara oqughuchilar jem'iyetliri fédératsiyesi türkiyede oquwatqan chet'ellik oqughuchilargha sahibxaniliq qilish, ularni tonushturush, öz-ara yéqin munasiwet ornitish, oqu-oqutush jeryanida ulargha maddiy we meniwi yardemde bolush, türkiyede ige bolghan tejribe we bilim chüshenchilirini oxshimighan jughrapiyelerge keng omumlashturushni qolgha keltürüsh meqsitide 38 sheherde qurulghan 49 xelq'araliq oqughuchilar jem'iyetlerning birleshmisi bolghan bir teshkilattur.

Bu teshkilat türkiyege yéngi kelgen Uyghur oqughuchilarghimu köngül bölüp kéliwatqan bolup, türk tili öginishi üchün kurs orunlashturush, mektepke qobul qilishqa yardemlishish, yataq-turalghu jaylar orunlishishida hemkarliship kelmekte.

Biz xelq'ara oqughuchilar ilmiy muhakime yighini toghrisida téximu köp melumatqa ige bolush üchün bu yighin'gha qatnashqan Uyghur ziyaliylardin mirkamil qeshqerli we abdul'eziz beshtoghraq ependiler bilen söhbet élip barduq.

Toluq bet