Uyghur pa'aliyetchi, jama'et erbabi hüseyin qari islamining hayati qandaq bir hayat idi?

Uyghur pa'aliyetchi, jama'et erbabi hüseyin qari islamining wapati Uyghurlarni matemge chömdürdi. Uning 98 yilliq hayati qandaq bir hayat idi? uning Uyghur dewasigha qoshqan töhpisi zadi qanchilik? bu heqte köz qarishini élish üchün dunyaning herqaysi jayliridiki Uyghurlar bilen téléfon söhbiti élip barduq.

Uzun yildin béri se'udi erebistanda hüseyin qari islamini yaxshi tonuydighan exmet mömin ependi, merhumning 98 yilliq hayatining Uyghur dewasigha atalghan ömür ikenlikini bayan qildi.

Sherqiy türkistan wexpining sabiq re'isi, tetqiqatchi hamit göktürk ependi hüseyin qari islamining yawropa, amérika we türkiyediki pa'aliyetliri toghrisida melumat berdi.

Hüseyin qari islami, 1980-yilidin bashlap Uyghur oqughuchilar türkiye, pakistan, misirgha oxshash nurghun döletlerge kélip oqushqa bashlighanda bu oqughuchilargha yardem qilish üchün se'udi erebistanda qurulghan talebe sanduqi yeni oqughuchilar sanduqining qurghuchi ezasi. U, se'udi erebistanda, islam dunyasida, türkiye we amérika qatarliq döletlerde Uyghur mesilisini anglitish üchün zor töhpilerni qoshti. Mezkur döletlerge bérip u, döletlerdiki siyasetchiler, parlamént ezaliri we zhurnalistlar bilen uchriship sherqiy türkistan dewasini anglatti.

Merhum hüseyin qari islami 1994-yili istanbulning sabiq sheher bashliqi, hazirqi re'is jumhuri rejep tayyip erdoghan bilenmu körüshken. 1992-Yili istanbulda chaqirilghan sherqiy türkistan milliy qurultiyigha qatniship, özining küresh tejribilirini anglatqan. Yene her qandaq sorunda özining hayat tejribilirini anglitatti. Bularni men öz közüm bilen körgen.

Dunya Uyghur qurultiyi ijra'iye komitéti mudiri dolqun eysa ependi hüseyin qari islamining sherqiy türkistan dewasigha qoshqan töhpisining zor bolghanliqini bayan qildi.

Dolqun eysa ependi bu yil 2-ayda se'udi erebistan'gha barghanda öyide ziyaret qilghanliqini, dewa toghrisida muhim söhbetlerni élip barghanliqini bayan qildi.

Dolqun eysa ependi sözining axirida hüseyin qari islamining wapatining sherqiy türkistan dewasi üchün zor bir yoqitish bolghanliqini allahtin uning yatqan yérining jennet bolushini tileydighanliqini éytti.