Bishkekte Uyghurlarning chet'ellerdiki pa'aliyetliri muzakire qilindi

Murasim qirghiz jumhuriyitining we sherqiy türkistan milliy marshi bilen bashlandi. 2018-Yili 28-noyabir, bishkek.

28-Noyabir küni qirghizistan paytexti bishkek shehiride dunya Uyghur qurultiyining qirghizistandiki wakaletchisi rozimuhemmet abdulbaqining uyushturushi bilen 6-noyabir küni jenwe shehiride ötküzülgen namayishning rohini yetküzüsh chong yighini échildi. Bu yighin'gha yawropadiki pa'aliyetlerge qirghizistandin qatnashqan toqquz wekil we bishkek shehiri shundaqla uning etrapliridiki yéza-sheherlerdiki Uyghur jama'etchilikning wekilliri qatnashti. Murasim rozimuhemmet abdulbaqining riyasetchilikide élip bérildi.

Murasim qirghiz jumhuriyitining we sherqiy türkistan milliy marshi bilen bashlandi, andin erkinlik yolida wapat bolghanlargha atap xetme-qur'an qilindi.

Murasim dawamida wekiller özlirining hés-tuyghulirini éytip, köpchilikni wetenperwerlikke chaqirishti. Namayishqa qatnashqan Uyghur tilidiki “Ittipaq” gézitining mu'awin muherriri, siyasiy penlerning magistiri abdurehim hapizi, dunya Uyghur qurultiyining pa'aliyetlirini yuqiri bahalap, 2018-yilini Uyghur tarixidiki muhim yil süpitide yézish kéreklikini tekitlidi

Abdurehim ependi yene 21-esirning béshida Uyghur mesilisi xitayning ichki ishi bolghan bolsa, bügünki künlerde dunya sehniside Uyghur mesilisi kötürülüp, gherb döletliri Uyghurlarni étirap qiliwatqanliqini alahide tekitlidi.

“Ittipaq” jem'iyitining sabiq re'isi dilmurat ekbarof öz nutqida rabiye qadir xanimning bu jehetlerdiki ish-pa'aliyetliridinmu ghururliniwatqanliqini bildürdi.

Shundaqla murasim dawamida dunya Uyghur qurultiyining re'isi dolqun eysa qirghizistan we qazaqistanda yashawatqan Uyghur jama'etchilikige öz murajitini yollidi. Riyasetchi rozimuhemmet ependi Uyghur jama'etchilikni birlikke chaqirip, dunya Uyghur qurultiyining siyasiy sehnide Uyghurlarning parlaménti ornida tonulghanliqini tekitlep ötti.

Mezkur yighin'gha qatnashqan “Insan hoquqlirini qoghdash” teshkilatining re'isi tursun islam ependi, radiyo ziyaritimizni qobul qilip, mezkur yighinni ehmiyiti toghrisida sözlep ötti.

Murasimgha qatnashqan “Ittipaq” jem'iyitining ayallar kéngishining re'isi rashidem emetxanowa d u q rehberlirige, shundaqla qirghizistandin qatnashqan 9 kishige teshekkürlirini bildürüp, dolqun eysa ependi yollighan murajetke qarita öz minnetdarliqini bildürüp, mezkur yighin arqiliq d u q élip barghan pa'aliyetler heqqide toluq melumatlarni alghanliqini alahide tekitlep ötti.

2018 Yili qirghizistandiki Uyghur jama'etchilikining élip barghan pa'aliyetliri we her xil yighin-murasimlirigha köp sanda kishilerning kélip qatnishiwatqanliqi, bu dölette yashawatqan Uyghurlarning öz millitining teqdirige, jümlidin Uyghur diyaridiki siyasiy weziyetke alahide diqqet bériwatqanliqini körsitidiken.

Uyghurlar asasen qirghizistanning bishkek shehiri we uning etrapidiki yézilargha, sheherlerge makanlashqan bolup, köp sandiki Uyghur ahalisi 1955-1962-yilliri Uyghur élidin köchüp kelgenler we ularning ewladliridur.