“Xitay eng chong démokratik dölet” serlewhilik maqale mesxirige uchridi

Muxbirimiz méhriban
2015.08.27
Share on WhatsApp
Share on WhatsApp
xitay-internet-tekshurush-cheklesh.jpg Xitay saqchilirining intérnét ishletküchilerning kimlikini tekshürüwatqan körünüshi. 2013-Yili 31-iyul, shendung.
Imaginechina

Xitayning hökümet géziti-“Yer shari waqti” da élan qilin'ghan “Kim eng chong démokratik dölet” serlewhilik maqale 14 sa'et ichidila xitay tordashlirining keng kölemlik mesxirisige uchrighan. Bu ehwal xelq'ara metbu'atlarningmu diqqitini tartqan.

“Kim eng chong démokratik dölet” serlewhilik obzor maqalisini béyjing chet'el tili uniwérsitéti partkom sékrétari xen yong qelemge alghan.

27-Awghusttiki gogul toridin tekshürginimizde xelq'arada tonulghan nurghunlighan xewer agéntliqliri, dangliq tor béketlirining külkilik xewerler stoni, ijtima'iy alaqe torlirida “Yer shari waqti géziti” de élan qilin'ghan bu maqale we 1000 din artuq xitay tordashlirining inkas yazghanliqi heqqide xewer we xewer analizliri élan qilin'ghan.

En'gliye b b s agéntliqi bügün élan qilghan “Yer shari waqti gézitining junggo eng démokratik dölet dégen maqalisi munazire qozghidi” serlewhilik xewer analizida maqaligha nisbeten xitay torlirida yézilghan xitay tordashlar maqale aptorini “Chet'el tilliri uniwérsitétning 1-qol bashliqi bundaq maqalini yézip élan qilghinida bashqilarning külke obyéktigha aylinishtin qorqmighanmidu?! yer shari waqti géziti bu maqalini élan qilish arqiliq ishenchlik halda özining démokratiye uqumidin xewiri yoqluqini ipadileptu,” dégen inkaslar neqil qilip élin'ghan.

Yaxo'o torining bügünki sanida “Yene bir külkilik xewer chiqti, junggo dunyadiki eng démokratik dölet imish” dégen mawzu bilen “Yer shari waqti géziti” diki maqale we xitay tordashlirining inkasliri bésilghan.

Xitay tordashliri maqalide ishlitilgen “Junggo eng chong démokratik dölet”, “Junggo démokratiyesi eng heqiqiy” dégen ibarilerge qapiyidash“Junggo eng qedimiy démokratik dölet”, “Junggo eng mukemmel démokratik dölet”, “Re'is maw zédong ulugh démokratiye teshebbuschisi”, “Medeniyet inqilabiy prolétariyatning démokratiyesi”,“Junggoda emeldarlar démokratiyedin paydilinip béyidi” dégendek mawzular qoyulup kinayilik inkaslar yézildi.

Béyjing chet'el tili uniwérsitétning partkom sékrétari maqalisining 1-abzasidila gherbning démokratiye teshebbusigha hujum qilip: “Gherb taratquliri her waqit hindistanni eng chong démokratik dölet dep medhiyeleydu, xongkongdiki öktichilerni ‛démokratiyini teshebbus qilghuchilar‚ dep teripleydu. Ularning meqsiti junggoni démokrat döletler qataridin siqip chiqirish, junggoda hökümetsizlik qalaymiqanchiliq keltürüp chiqirish. Emeliyette junggo 21-esirdiki eng heqiqiy démokratiyini namayan qildi. Junggo hökümiti eng ünümlük démokratiyini emelge ashurdi.” dégen ibarilerni ishletken.

Xenyongning maqalisige inkas yazghan gu'angdungluq bir tordash xenyongning sözini mesxire qilip, “Sékrétar janabliri toghra deydu. Menmu qoshumche qilay. Maqaligha ‛junggo eng qedimiy démokratik dölet‚ dégen ibarilerni qoshqan bolsa téximu mukemmel bolattiken. Chünki jen'go dewridiki mingzi ‛awamning könglini alsang jahanni qolgha alisen dégen‚. Re'is maw zédong ‛xelq üchün xizmet qilayli!‚ dégen. Junggoda xelq kompartiyeni tallidi. Ulugh, dana, héch qachan xatalashmaydighan kompartiye we hökümiti hakimiyetni mehkem tutup, izchil xelqning menpe'etni üchün xizmet qilmaqta. Shunga dölitimiz xelqining atalmish ‛kishilik hoquq‚ dégen quruq émizgige elwette éhtiyaji yoq. Junggoda mingzi démokratiyini teshebbus qilghanda amérikaliqlar téxi mewjut emes idi. Shunga ‛junggo eng chong démokratik dölet dégen bu söz zadila xata emes!‚ dep yazghan.

Xubéy tiyenmin shehiridiki bir tordash “Junggoche démokratiye” dégen mawzuni qoyup, “Dahiymiz maw zédong ‛xelq démokratiyesi asasidiki diktator barliq eksiyetchilerge zerbe béridu‚ dégen. Mana bu peqet junggodila bar démokratiye. Biz kompartiye yaritip bergen hemme adem barawer, xatirjem tereqqiy qilghan bügünki turmushimizgha razi. Shunga biz pexirlen'gen halda bizge junggoche démokratiye kérek, gherbning qalaymiqanchiliq tughdurush gherizidiki atalmish kishilik hoquq démokratiyesi kérek emes” dégen inkasni yazghan.

Béyjing chet'el tili uniwérsitétning partkom sékrétari xenyong maqaliside yene “Bezi döletler démokratiye dégen sözni destek qiliwélip, pul we menpe'et guruhlirining kontrolluqidiki birqanche siyasiy partiyiler ichidin dölet rehbiri saylimaqta. Ular ‛démokratik saylam‚ namidiki bu tüzümni junggogha tangmaqchi.” dep yézip, gherb démokratik döletlirining démokratik saylimigha hujum qilghan.

Xenyongning bu sözlirige inkas qayturghan guyjuluq bir tordash öz nahiyisidiki bir qétimliq atalmish démokratik saylamni neqil élip, mesxirilik ibariler arqiliq junggoche démokratik saylamni tenqidligen.

U mundaq dégen:“Men bashqa gep qilmay peqet öz béshimdin ötküzgen nahiyimizdiki démokratik saylamnila neqil alay. Bizning rayonda xelq wekili saylighanda idarimizning teshkillishi bilen aldinala ismi belgilep qoyulghan üch kishige bélet tashliduq. Bizge bu üch kishidin özünglar tallighan kishige belge qoyunglar dédi. Bu kishilerni men bilmeydikenmen, ularning néme ish qilidighanliqi héchkimge ayan emes iken, emma biz yenila ularning ichidiki bireylen'ge xalighanche belge urduq. Mana bu hazir bizde omumlashqan junggoche démokratik saylam. Bizde elwette chet'ellerdikidek özini namzatliqqa körsetken kishiler japa tartip öz pilanlirini sözlep, puqralargha néme ish qilip béridighanliqi heqqide wede bermeydu. Kishilerdin özini qollap bélet tashlashni telep qilmaydu. Hökümitimiz xelqni waqti zaye bolmisun, saylinidighan bashliqni izdep aware bolmisun dep, özila eng muwapiq namzat körsitip béridu. Bizmu buninggha könük. Biz elwette gherbche démokratik saylam élip barimiz dep jem'iyetni qalaymiqan qilsaq bolmaydu-de?”

Nenjing shehiridin bir tordash “Xenyong ependi, ‛gherb döletliri junggoni démokratik döletler qataridin chiqiriwetti‚ dep waysimisa boptiken. Méningche dölitimizde hökümet emeldarliri démokratiyedin paydilinip taza béyiwatidu. Qaranglar hetta eng töwen derijidiki hökümet emeldarlirimu junggoche démokratiyedin ünümlük paydilinip, parixorluq bilen béyip ‛kichik yolwaslar‚ gha aylinip boldi. Hazir balilirimizni mektepke kirgüzüsh üchün mektep mudirigha para bérimiz. Doxturgha dawalinish üchün ‛qizil bolaq‚ bérimiz. Hökümitimiz pash bolghan bu parixor emeldarlarni tutupmu tügitelmeywatidu. Tyenjindiki partlash weqesige seweb bolghinimu shu jaydiki saqchi bashliqining oghlining igidarchiliqidiki ximiyilik buyumlar iskilati iken. Mana bu junggoda hökümet emeldarliri démokratiyedin eng ünümlük paydiliniwatqanliqining emili misali” dep yazghan.

Nenjingliq yene bir tordash kinayilik qilip, “Ejeba gherbning démokratik tüzümi yaxshi bolmisa, undaqta pütün dunyadiki köpligen döletler yene néme üchün démokratiyini teshebbus qilidu? démokratik saylam tüzümini yolgha qoyidu? xongkong junggogha qayturup bérilgendin kéyin junggo yene néme üchün bir dölet ikki xil tüzümni teshebbus qilidu? xongkongluqlar néme üchün chong quruqluqning tüzümini qobul qilishni xalimaydu? teywenlikler néme üchün junggoning tüzümini yolgha qoymaydu?” dep yazghan.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.