Tarix tarazisidin xitayning 3-séntebirdiki herbiy paratigha qoyulghan so'allar

Muxbirimiz qutlan
2015.08.27
Share on WhatsApp
Share on WhatsApp
yapongha-qarshi-parat.jpg Xitay yapon'gha qarshi urushning ghelibisini qolgha keltürgenlikining 70 yilliqini tebriklesh munasiwiti bilen 3-séntebir béyjingda ötküzmekchi bolghan herbiy paratigha teyyarliq qiliwatqan herbiyler. 2015-Yili 23-iyul, béyjing.
XINHUA

Pütün dunya xitayning 3-séntebirde béyjingda ötküzmekchi bolghan herbiy paratigha guman we heyranliq so'al qoymaqta.

Ikkinchi dunya urushi axirliship aridin top-toghra 70 yil ötken bügünki künde xitay hazirqi zaman dunya tarixni qayta yéziwatamdu-qandaq? xelq'ara fashizm sépini, bolupmu sherqtiki yaponiye militarizmni meghlup qilghan hel qilghuch amil amérikining tinch okyandiki urushimu yaki uning yaponiyege tashlighan ikki dane atom bombisimu we yaki sowét qizil armiyisining manjuriyege kirgen bir milyon kishilik qoshunimu?

Eyni chaghda qahire xitabnamisige qol qoyghan üch dölet rehbirining biri bolghan jang keyshining ornigha bügünki künde néme üchün mawning resimi almiship qaldi?

Radi'omiz ziyaritini qobul qilghan amérikidiki Uyghur ziyaliysi doktor jür'et obul bilen shiwétsiyediki Uyghur ziyaliysi abdushükür muhemmet bu heqte öz qarashlirini bayan qildi.

Ular birdek xitay kompartiyesining tarixni astin-üstün qilip, öz menpe'iti üchün “Saxta tarix” yasawatqanliqini, 1945-yili yaponiyening urushta meghlup bolushida amérika bilen sowét ittipaqining hel qilghuch rol oynighanliqini tekitlidi.

Jür'et obul ependi xitay 3-séntebirde ötküzmekchi bolghan herbiy paratning shekli we mezmunining emeliyette eyni chaghda natsistlar gérmaniyeside ötküzülgen mushu shekildiki herbiy paratlargha oxshaydighanliqini sélishturma qildi.

Abdushükür ependimu pütün memliketni seperwer qilip küch körsitish, armiyeni qozghap parat ötküzüshtek heywe taktikisining 1930-yillarda natsistlar gérmaniyeside, andin sowétlar ittipaqida, kéyinche xitayda dawamlashqanliqini tilgha aldi.

Ular ziyaritimiz jeryanida munularni tekitlidi: “Bügünki künde xitay kompartiyesi yapon'gha qarshi urushning ghelibisini özining qiliwélishqa urun'ghini bilen, maw zédongning 1970-yillarda yaponiyege éytqan rehmiti tarixning esli mahiyitini éniq chüshinishimizge yardem béridu.”

“Bügünki künde xitay hökümitining qiliwatqini xitay xelqide yaponiyege qarshi öchmenlik we qisasxorluqni qozghash boluwatidu. Halbuki, buning eksiche yaponiye we yapon xelqi eyni chaghdiki urushning xata bolghanliqini étirap qildi, kechürüm soridi hemde buningdin kéyin yüz bérish éhtimali bolghan herqandaq urushtin saqlinishning yolini izdimekte, xalas.”

Tepsilatini awaz ulinishtin anglighaysiz.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.