Қазақистандики уйғур язғучилар йиллиқ хуласә йиғинида муһакимә елип барди

Ихтиярий мухбиримиз ойған
2015-12-23
Елхәт
Пикир
Share
Принт
Қазақистандики уйғур язғучилар йиллиқ хуласә йиғиниға қатнашқан бир гуруппа уйғур язғучилири. 2015-Йили 23-декабир, алмата.
Қазақистандики уйғур язғучилар йиллиқ хуласә йиғиниға қатнашқан бир гуруппа уйғур язғучилири. 2015-Йили 23-декабир, алмата.
RFA/Oyghan

23-Декабирда қазақистан язғучилар өйидә қазақистан язғучилар иттипақи йенидики уйғур әдәбияти кеңишиниң мәҗлиси болуп, униңда қазақистан язғучилар иттипақи әзалириниң қатнишиши билән уйғур әдәбиятиға мунасивәтлик муһим мәсилиләр муһакимә қилинди.

Алди билән сөзгә чиққан уйғур әдәбияти кеңишиниң башлиқи, язғучи вә драматорг әхмәтҗан һашири уйғур язғучилириниң 2015-йилда йәткән утуқлири һәмдә 2016-йилға пиланланған иш-паалийәтлири һәққидә доклат қилди.

У өз сөзидә, уйғур язғучилириниң иқтисадий қийинчилиқларға қаримай, һезмәт абдуллин, рәһимҗан розийеф, турған тохтәмоф қатарлиқ атақлиқ язғучилар тәвәллутлириниң дағдуғилиқ өткүзүлгәнликини алаһидә тәкитлиди. У шундақла болупму түркийә җумһурийитиниң қоллап-қуввәтлиши билән өткүзүлгән мәдәний паалийәтләрниң уйғурлар үчүн әһмийити вә келәчикиниң муһимлиқини, уйғур язғучилири әсәрлириниң қазақ, рус, түрк вә башқа тилларғиму тәрҗимә қилинишиниң зөрүрлүкини көрсәтти.

Әхмәтҗан һашири радиомиз зияритини қобул қилип, мундақ деди: «бизниң язғучилардин авут мәсимофниң әсири 2016-йили дөләт буйрутмиси билән чиқиду. У биз үчүн чоң йеңилиқ. Мән уйғур әдәбияти кеңишиниң рәиси сүпитидә бизниң язғучиларниң өзиниң бир кишилик төһписини қошуп келиватқанлиқини ейтқум келиду. Әң чоң нәрсә бизниң драматорглиримиздиму чоң йеңилиқимиз бар. язғучи вә драматорг әкрәм әхмәтофниң әсири түркийәдә өткән чоң мусабиқидә қазақистан бойичә иккинчи орунни алди.»

Йиғин қатнашқучилири шундақла 2016-йилда қилинидиған ишлар, җүмлидин атақлиқ язғучилар мәсүмҗан зулпиқароф вә патигүл сабитоваларниң тәвәллутлириниң өткүзүшкә мәсул шәхсләрниң тизимини бекитти. Улар бүгүнки күндә язғучилар алдида туруватқан муһим мәсилиләрни муһакимә қилди.

Йиғинда сөзгә чиққан драматорг әкрәм әхмәтоф болса, өзиниң йеқинда түркийәгә қилған сәпири һәм шундақла түркий хәлқләр мәдәний тәшкилатиниң уюштуруши билән өткән сәнәт көрикидә иккинчи мукапатқа еришкән «мәхмут қәшқири» драмисиниң бәдиий мәзмуни вә әһмийити, түрк мәмликитиниң уйғурларға көрситиватқан ғәмхорлуқи һәққидә тохталди.

Радиомиз зияритини қобул қилған шаир вә язғучи тилман нурахуноф һазирқи заман қазақистан уйғур әдәбиятиниң әһвали вә қазақ язғучилириниң уйғурларға көрситиватқан ғәмхорлуқини алаһидә тәкитләп, мундақ деди: «бүгүнки заманимизниң иқтисадий қийинчилиқи дәвридә қазақистандики уйғур әдәбиятиниң тәрәққиятини оттура дәриҗидә дәп баһалашқа болиду. Чүнки җүрәт билән тәрәққий қилишниң һәммиси мушу иқтисадқа бағлиқ болуп қалғачқа, наһайити юқири дәп ейтип кетәлмәймиз, сәвәби нурғунлиған язғучилиримизниң әмгәклири техичә қолязма һалитидә туриду. Бу йили азрақ китаблар нәшр қилинған болса, кейинки йиллири һамийлар тепилип, уйғур язғучилириниң китаблири нәшр қилиниду, дәп ойлаймән. Қандақла болмисун, қазақистан җумһурийитидә мәвҗут чоң әдәбиятларниң арисида уйғур әдәбияти вәкиллириниң хәлқимизгә игидарчилиқи көп һәм бурунқи кеңәш иттипақи даирисидин қарайдиған болсақ, қазақистандики уйғур әдәбияти әң чоң әдәбиятларниң бири болуп һесаблиниду. Қазақистан язғучилар иттипақи қармиқидики уйғур әдәбияти кеңишиниң рәиси әхмәтҗан һаширофниң рәһбәрликидә 2015-йили бир қанчә яхши ишлар әмәлгә ашурулди. Болупму алдинқи йили әсәрлиригә баһалар берилип, тәнқидий пикирләр ейтилди, әдәбият мавзусиға мақалиләр йезилди. Шуниң билән биргә вапат болуп кәткән язғучилиримизни хатириләш кәчлири уюштурулди.»

Тилман нурахуноф язғучилар әсәрлириниң уйғур хәлқиниң тарихи, мәдәнийити, муң-зари, арзу-арманлири тәсвирләнгәнлики билән қиммәтликини, шуниң үчүн әнә шундақ әсәрләрни тәрғиб қилишниң муһимлиқини алаһидә тәкитлиди.

У өз сөзидә йәнә мундақ деди: «шундақла бу йили нәшргә тәйярлинип, қазақ тилиға тәрҗимә қилиниватқан балилар шеирийитигә беғишланған антологийәни ейтишқа болиду. Униңда уйғур әдәбияти кеңишиниң әзалири өмәр муһәммәдийдин тартип та бүгүнки күндә қәләм тәвритиватқан, яш өсмүрләргә беғишлап йезиватқан, балилар әдәбияти тәрәққиятиға өз үлүшини қошуватқан қәләмдашлиримизниң шеирлирини топлап, қазақ қериндашлар билән бирликтә қазақ тилиға тәрҗимә қилип, антологийә нәшр қилишни қолға алди. У алдимиздики йили нәшрдин чиқиши керәк. Бу җәһәттә мушу тәклипни бәргән һәм һәр тәрәплимә қоллаватқан қазақистан язғучилар иттипақи башқармисиниң рәиси нурлан оразалинға тәшәккүр изһар қилишимиз керәк һәм шундақла уйғур шаирлириниң шеирлирини тәрҗимә қилип, нәшргә тапшуруватқан қазақ қериндашлиримизғиму көплигән рәһмәтләрни ейтимиз.»

Пикирләр (0)
Share
Толуқ бәт