Emma u, birla nersini untumidi...

Ablikim éli 2003-yilidin bashlap, ishlepchiqirish qurulush bingtu'enning 142-polkigha 1000din artuq Uyghur ishlemchini bashlap bérip paxta tériwélish ishigha saptu. Shundaq aktip ishligen ablikim éli, 2004-yili 5-ayda peyzawat nahiyiside “Artuq emgekchilerni sirtqa chiqirish xizmet ponkiti” qurulghanda nahiyilik hökümet teripidin ablikim éli shu ponkitqa bashliqliqqa teyinliniptu. Ablikim éli hazirghiche peyzawat nahiyisidin ichkiri xitaygha qanchilik emgek küchi yollidi? buning ichide oghullar qanche, qizlar qanche? yuqiriqi xewerde bu toghrida héchqandaq sanliq melumat bérilmidi. Lékin, xewer yazghuchining xewer qilishigha qarighanda, peyzawat nahiyisidin 2009-yili bir yil ichide 68ming adem (qétim) emgek küchi sirtqa emgekke chiqirilghanmish.

Undaqta peyzawat nahiyisining nopusida qanchilik Uyghur bardu? bu sanning qanchisi Uyghurning qizi, qanchisi Uyghurning oghlidur?
Sélishturup baqayli! bir yilda 68ming adem (qétim) mustemlike yurtlardin poyizgha olturup ichkiri xitaygha we bashqa yurtlargha Uyghurlar ishlemchilikke ewetilidighan bolsa,yene 68ming neper xitay köchmen ghuljigha, xoten'ge, turpan'gha, qeshqerge poyizdin töküldi deyli؛

 Ichkiri xitaygha yötkep kétilgen 68ming neper Uyghur oghul- qizliri ichkiri xitayda yaki bingtu'ende néme ish ishleydu? poyizgha olturup Uyghur yurtlirigha köchüp chiqqan 68ming xitay köchmen qeyerde ishleydu? eger Uyghur éshindi emgek küchlirini ichkiri xitaygha ishqa orunlashturup ishsizliqni tügitish meqset qilin'ghan bolsa, Uyghurlarni ichkiri xitaygha yötkep yürüp aware bolmay, ichkiri xitaydin chiqqan köchmen xitaylarni köchürüshni toxtitip qoyup, ular mustemlike yurt “Shinjang” gha chiqip ishleydighan ishni, xizmetni yerlik Uyghur éshindi emgek küchlirige berse, shu xizmetlerge Uyghurlarni orunlashtursa bolmamdu?

Yene mesilen, éhtimalgha yene shundaq deyli, ablikim éli 1000neperdin artuq Uyghur déhqanni yétilep bérip 142‏-polkta paxta térishke orunlashturuptu. Démek, Uyghurlar ishsiz qaldi dégen söz. Némishqa wang kijang yaki jang kéjang bingtu'enning xitayliridin 1000 neper kishini yétilep kélip Uyghur yurtlirida paxta térishke orunlashturup, pul tapmaydu? némishqa Uyghurlar xitaygha ishlemchi, yilliqchi, medikar bolup ishlep béridu? némishqa xitay Uyghurgha héch bolmighanda heptilik ishlemchi, hetta pesil qoshliri bolup yitip kélidighan xitaylarmu Uyghurgha ishlemchi bolup ishlep bermeydu?

Emgek küchi- emgek küchining iqtidarini jari qilduralaydighan bir shara'it, emgek shara'itigha érishken bolushi shert. Emgek shara'itini kim teyyarlaydu? hoquq teyyarlaydu. Uyghurlarning emgek shara'iti yaritidighan hoquqi yoq. Tömür, mis kanlirini achalmaydu.

Tebi'iy gaz we néfitlik achalmaydu, meblegh sélip zawut, fabrika quralmaydu, shundaq iqtidarni teyyarlighan az sanda Uyghurlar bolsimu, ular yuqiriqidek qilalmaydu chünki, hoquqning pilanlash küchi, hoquqning testiqlash küchi, hoquqning teshkillesh küchi bundaq Uyghurlarning qolida yoq. Shunga hoquq, emgek shara'iti, emgek küchining munasiwetliride otturigha chiqidighini, qul bilen xojayinning iqtisadi, siyasiy munasiwetlirini belge qilghan ijtima'iy tüzümdur.

Buning ispati néme? xewer yazghuchi “U bir nersini untumidi. U bolsimu partiyige bolghan muhebbet, ittipaqliqqa bolghan eqidini untumidi” deydu. Némiken u partiye dégen, partiye dégen'gimu muhebbet qoyidighan ish barmiken? néme u milletler ittipaqliqi dégen, hoquq tenglikini, hoquq barawerlikni tekitlimey, noqul milletler ittipaqliqini tekitligen mustemlike bir elde, buni tekitlesh-emeliyette zorawanliqni tekitleshke barawerdur. Ablikim éli partiyige muhebbet qoyuwatqini yoq, emeliyette quldar xitaygha, xojayin xitaygha muhebbet qoyushqa mejbur boluwatidu.