Inqilab dégen mundaq bolmamdu!?

Ayallar, hetta balilarmu misir démokratik inqilabchiliri we namayishchilirining qatarigha qoshuldi. Misirda 1-ayning 25-küni bashlan'ghan namayishchilar qoshuni bügün etigende eljezire téléwiziyisining xewirige asaslan'ghanda, bir milyondin éship ketti.

Prézidént mubarek hazirghiche téxi texttin chüshmidi. U hökümet kabinétini özgertip teshkillep baqti. Lékin, misir xelqi qobul qilmidi. Xelq peqet 30 yil hakimiyet béshida turghan hökümetning, mubarekning texttin chüshüshini telep qildi. Bu inqilab toghrisida yazghan nurghunlighan muxbirlar ishsizliq, hakimiyetni almashturush muddi'aliri, iz basar belgileshke qarshi turush muddi'aliri we mubarekning mustebit siyaset yürgüzüshige qarshi meqsetliri wehakazalar ni bu qétimqi inqilab qozghilishning sewebi qilip körsitishti.

Méningche, bu inqilab ereb dunyasida hoquqchiliq idiyilirining ösüp yétilip ghayiwi jimliqtin shiddetlik heriketke aylan'ghanliqini körsitip berdi. Herbir misirliqning hoquqchiliq éngining piship yétilgenlikini körsitip berdi.

Bu qétim misir inqilabi 20-esirning 70-yillirida kötürülüp ghelibe qilghan ereb milletchilikining yene bir qétim shiddetlik bash kötürgenlikining delili bolup qaldi. Biraq perq shu yerdiki, ereb milletchiliki bu qétim noqul diniy helekchilik bilen emes, démokratik islahatchiliq, démokratik hoquqchiliq we pütkül islam dunyasini démokratik oyghinishqa chaqiriq qilghan qozghatquchi xaraktérlik inqilab bolup qaldi.

Misir üzül-késil inqilab qilishi kérek dep tönidi misirliqlar. Mubarek we uning a'ile jemetining misirgha hökümranliq qilishi axirlishishi kérek idi. Misir inqilabi bu qétim ottura sherq ellirige kéngeygendin bashqa, hetta bu inqilab ottura asiyaghiche kéngiyishi mumkin.

Prézidént hösni mubarekni mustebit déduq. U bu qétim namayishchilargha oq chiqardimu? yaq! prézidént mubarek amérikining prézidénti obamaning, dölet ishlar katipi hilariy xanimning, gérmaniyining weziri markél xanim qatarliq dunyawi dölet rehberlirining meslihet-pikirlirige qulaq sélip, deslepte yüz bergen saqchilar bilen puqralar otturisidiki toqunushni hésabqa almighanda, tanka, broniwiklerni heydep sheherge kirgen misir armiyisi namayishchilargha qaritip bir pay oq chiqarmidi. Yash balilar tankilarning üstige chiqiwélishti. Anilar perzent eskerlerni söyüp raziliqini ipadilidi. Misir armiyisi xelqning armiyisi ikenlikini toluq namayan qildi. Misir xelqi bu armiyini béqip terbiyiliginige xush boldi.

Prézidént mubarek, mustebit dep teriplensimu, bu ademning medeniyet sapasigha, bu ademning bu qétim misir xelqige ademgerchilik bilen mu'amile qilghanliqigha qarap, gerche hazirghiche hoquq tapshurushni ret qilghan bolsimu, shexsen men özüm rehmet éytishni rawa kördüm. Peqet mushundaq dahi bolghan yerdila mushundaq inqilab bolidu xalas. Misir inqilabidin qorqup ketken win jyabaw chaghan küni pul paxalliqini tizginleymen, öy bahasining örlep kétishini tizginleymen dep, xitay puqralirigha qaritip nutuq sözlidi. Lékin, inqilab qilish üchün bir xelq- her jehettin yétilgen bir xelq bolushi kérek-te!