' Азадлиқ армийә ' уйғур мустәқилчилиригә зәрбә бериш үчүн оттура асияға әскәр чиқирамду?

Дове тор бити шаңгаңда нәшр қилинидиған "әйнәк гезити" ниң хәвиридин нәқил кәлтүрүп, 2009‏ - йили 7‏ - айниң 24‏ - күни мундақ көрсәтти: үрүмчидә "5‏ - июл намайиши" вә "5 - июл қирғинчилиқи" йүз бәргәндин кейин хитай һәрбий тәрәпниң юқири дәриҗилик әмәлдари түнҗи қетим ипадә билдүрүп, оттура асияға әскәр чиқирип "шинҗаң мустәқиллиқи" йәни мустәқилчи уйғурларға зәрбә беришни ойлишиватқанлиқини көрсәтти.
Обзорчимиз сидиқ һаҗи рози
2009-07-28
Share

Дове тор бити йәнә мундақ көрсәтти: "азадлиқ армийә" ниң баш шитап башлиқи чин бинде түнүгүн хитайниң җилин өлкисидә җуңго һәрбий тәрәп терористларға қарши уруш қилишқа толуқ тәйярлинип қойди, бирләшкән дөләтләр тәшкилати һоқуқ берип йол қойидиғанла болса, хитай һәрбий тәрәп шаңхәй һәмкарлиқ тәшкилатиниң рамкиси ичидә оттура асия дөләтлиригә әскәр чиқирип, бирлишип уйғур мустәқилчилиригә, терорист күчләргә зәрбә бериду деди, дәп көрсәтти.

Шитап башлиқи генерали чин бинде вә мәркизи сияси қанун комитетиниң башлиқи җу юңкаң қатарлиқлар җяңсу, гәнсу, нәнҗиң қатарлиқ хитайниң өлкә шәһәрлиридин қораллиқ сақчи қисим, һәрбий қисимларни үрүмчигә йөткәп келип, намайишчи уйғурларни қирғин қилип "5‏ - июл үрүмчи қирғинчилиқи" ни пәйда қилди. Генерал чин бинде оттура асияға әскәр чиқиримиз деди. Уйғүристанниң у тәрипидики дөләтләрдә яшаватқан уйғурларни мустәқилчиләр дәп бастурмақчиму яки пурсәттин пайдилинип оттура асияға әскәр чиқирип пүткүл оттура асияни хитайниң мустәмликисигә айландурмақчиму?

Бу қетим хабаровискида өткүзүлгән русийә федератсийиси билән хитайниң бирләшмә һәрбий маневирида русийиликләр хитайға шундақ имтияз бәргәнму яки бирләшкән дөләтләр тәшкилати хитайниң оттура асияниң ғәрбигә әскәр чиқирип шу йәрдә яшаватқан уйғурларни хитай армийисиниң бастурушиға иҗазәт бәрмәкчиму? немисигә чоң сөзләйду генерал чин бинде?!

Уйғурниң сиясий палийәтчилири ойлайдуки, хитай һөкүмити вә униң мустәмликә уйғуристанға әвәтилгән әскири қисимлири вә қораллиқ сақчи қисимлири йеқин кәлгүсидә мустәмликә уйғуристанда тинчлиқ сақлаш қисимлириниң вәзиписини атқурушқа мәҗбур болиду; худди сабиқ советләр һөкүмити оттура асиядин әскәр чекиндүргәндә һәрбийләрни чекиндүрүп һәрби қорал - ярақларни әмдила мустәқиллиқ җакарлиған дөләтләргә ташлап берип чиқип кәткәндәк, генерал чин биндему һәрбий қорал - ярақларни уйғуристанниң өткүнчи һөкүмитигә тапшуруп беришкә мәҗбур болиду. Уйғурлар ойлиғандәк, генерал чин бинде оттура асияға әскәр чиқиришқа тәйярлинип қойдуқ деди. Әгәр чин бинде, алимадис мустәмликә уйғуристандин әскәр чекиндүрүшкә тәйярлинип қойған болсичу? мубада бирләшкән дөләтләр тәшкилати чин биндениң оттура асияға әскәр чиқиришиға буйруқ бәрмәй, еһтималлиқ ичидә мустәмликә уйғуристандин әскәр чекиндүрүшигә буйруқ бәрсичу? чин бинде қандақ қилиши керәк? һәрбий адәм әлвәттә буйруққа әмәл қилиши керәк! чүнки генерал чн бинде өзиниң дейишичә, хәлқара җәмийәтниң бәлки бирләшкән дөләтләр тәшкилатниң буйруқ беришини күтүп турупту, дә!

Вақит дегән бу пәлсәпивий уқумни сиз қандақ ойлайсиз, башқилар қандақ ойлайду, мән қандақ ойлаймән, чүшәнгили болмайду. Вақитни билгән адәм өтмүшни билиду, тарихни билиду, реаллиқни билиду. Билмигәндиму аз - тола һес қилип йитәләйду. Генерал чин бинде шуни биливелиңки, вәқәләрниң вақит ичидә өзгириши, демәкчимәнки, сизниң ирадиңизгә вә миниң ирадәмгә биқинмайду!

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт