Җуңго америка кемисигә чеқилишқа җүрәт қилаламду?

"Вәнвий "тор бети 2010 - йили 8 - айниң 13 - күни елан қилған "америка һәрбий тәрәп: әгәр җуңго авиаматкини чөктүрүветидиған болса, америка җуңго қуруқлуқини бомбардиман қилиду"деди мавзулуқ мақалисидә: "... Әгәр иш доклатта ейтилғандәк болса, һәр бир авиаматка америка деңиз армийиси вә пүткүл америка үчүн ейтқанда интайин муһим болғанлиқтин, авиаматка чөктүрүветилгән һаман урушниң даириси вә көлимини тизгинләш мумкин болмай қалиду, шу вақитқа йәткәндә урушниң ақивитини ким һөддигә алалайду" деди, дәп көрситилди.

"Бошүн" тор бети 2010 - йили 8 - айниң 13 - күни елан қилған "азадлиқ армийә қаттиқ сөз қоювәтти, җәнубий деңизда уруш қилимиз" деди. Сәрләвһилик мақалисидә: "деңиз армийиниң сабиқ муавин қомандани генерал майор җаң шусән, әтраптики дипломатик мунасивәтләрни тәртипкә селип, җәнубий деңизда урушқа тәйярлиқ қилайли!" дәп тәшәббус қилди дейилди.

"Бошүн" тор бети 2010 - йили 8 - айниң 14 - күни елан қилған "америка, җуңго дөләтлириниң бир - бирини истратегийилик синақ қилиши, америка, җуңго дөләтлириниң тәқдирини бәлгиләйду" мавзулуқ мақалисидә: "җуңго,америка мунасивити җиддийлишип кәтти, йүзәки қариғанда вәқәниң қозғилишиға тйәнән бәлгилик парахот вәқәси сәвәб болғандәк көриниду... Чуңқур қатламдин қариғанда, америка, җуңго мунасивитиниң җиддийлики, америка, җуңго икки дөләтниң қурулма характерлик истратегийилик зиддийәтлириниң һасилатидур ....

Бу қетимқи америка, җуңго мунасивитиниң җиддийлики, америкида җуңгоға қаратқан истратегийилик сиясәтниң бурулуш нуқтисиға келип қалғанлиқини ашкара көрсәтти... Америка, җуңго мунасивити йеңи басқучлуқ бир - бирини синишиш, қарши тәрәпни синап беқиш мәзгилигә кирди. Ахирқи нәтиҗә, америкиниң, җуңгоға қаратқан истратегийилик сияситиниң характерини вә кәлгүси дуняниң сияси вәзийитини бәлгиләйду"дәп көрситилди.

Юқирида хитай язғучилириниң, "азадлиқ армийә гезити"ниң, хитай генераллириниң америка тоғрисида вә америка деңиз армийиси 7 - искадирониниң җәнубий деңиз тақим араллири, япон деңизи, сериқ деңиз, ениқрақи асия - тинч окян райони очуқ деңизда пәйда болуп һәрбий маневир елип барғанлиқини тәнқидлигән вә уруш попозиси билән рәддийә бәргән сөз - ибарилирини көрүп өттуқ.

Пәқир обзорчи вә йәнә башқа америкиниң җуңго сиясити өзгириш дәвригә кирди дәп қариғучилар, һәқиқәт билән сөзлигәндә америка җуңго сияситини, болупму 1945 - йили 2 - айниң 11 - күнидин 14 - күнигичә ечилған "ялта" йиғинида бәлгиләнгән "бир җуңго " сияситини, йәни "сабиқ советләр һөкүмити билән хитай гоминдаң һөкүмитиниң һәмкарлиқини қолға кәлтүрүш, шундақла америкиниң җуңгони тинч йол билән бирликкә кәлтүрүш сияситини йолға қоюш - ялта келишиминиң мәқсити" болған бир җуңго сияситини; "әмәлийәттә җуңгони бу дәриҗидә бирликкә кәлтүрүшниң һечқандақ сияси асаслири йоқ иди", дейилгәндәк, йоқ йәрдин бәлгиләнгән бир җуңго сияситини; (америкиниң җуңгодики мәғлубийити " хитайчә нәшри аптори түс таң), 1979 - йили1 - айниң 1 - күни елан қилинған " җуңхва хәлқ җумһурийити билән америка қошма штатлириниң дипломатик мунасивәт орнитиш тоғрисидики бирләшмә ахбарати"да көрситилгән "бир җуңго" сияситини("әсирлик делолар" хитайчә нәшри 1996 - йил, 453 - бәт) өзгәртидиған вақит кәлди дәп қарамдиғанду? чүнки, манҗуларму, ички моңғулларму, уйғурларму, тибәтләрму, йәрлик тәйвәнликләрму америкиниң өзлиригә мустәқил сиясәт бәлгилишигә тәқәзза болуватиду.