Shayar nahiyisi qaysi kün'ge duchar boldi?

Tebi'etning özide yene tebi'ettek tebi'iy yashap kelgen shayar xelqi néme künlerge duchar boldi? "tengritagh" tor bitide 8 - ayning 15 - küni élan qilin'ghan "shayar aptonom rayonimizdiki toqumichiliq chong nahiyisige aylandi" mawzuluq xewerde: "dangliq toqumichiliq karxanilirining shayar nahiyisige arqa - arqidin makanlishishigha egiship, shayarning sana'et endiziside özgirish bolup, aptonom rayonimizda birdin - bir paxta ishlepchiqirishta küchlük nahiyidin toqumichiliq sana'itidimu chong nahiyige aylandi" déyildi.
Obzorchimiz sidiq haji rozi
2010.08.31

Xitay mustemlikichiliri 20 - esirning 50 - yillirida ürümchidiki bulaqtagh toqumichiliq fabrikisini musabaylar a'ilisidin tartip alghandin bashlap, xoten laskoyda yipek toqumichiliq, aqsuda yung toqumichiliq, ghulja shehiride yung toqumichiliq, qeshqerde paxta toqumichiliq fabrikisi qurghan idi. Bu fabrikilarda asasen xitay köchmenliri ishchi bolup ishleytti. Xam eshya ornida yung - paxta Uyghur déhqanlirining qolida ishlepchiqirilatti. Xitay köchmenliri shu derijide sana'etlishetti, Uyghur déhqanliri shu derijide déhqan bolup qéliwiretti.

Emdi qaraymizki, yiligha 1 milyon 600 ming den paxta ishlepchiqiridighan "shayar nahiyisi" bayliq ewzellikini, iqtisadi ewzellikke aylandurush üchün "shayar nahiyisi ichkiri xitaydin shirket chaqiriptu." Jéjang ölkisining ' xungli toqumichiliq shirkiti' 60 ming urchuq, jyangsu ölkisining 'fuxung toqumichiliq shirkiti ' 30 ming urchuq sipte toqush liniyilirini poyizgha qachilap, shayar nahiyisige yürüsh qiliptu. Uningdin bashqa "xongkung beylung guruhi", xénen "xeyyang guruhi" deydighan guruhlar 100 ming urchuqluq renglik toqush zawutini ishqa sélishqa we paxta botqisi ishlepchiqirishqa teyyarliq qiliwétiptu.

Xangju, shangxey sheherliri xitayning yénik sana'iti jümlidin toqumichiliq fabrikiliri jaylashqan sheherler, urchuq we zawutlarni bu sheherlerdin yötkep kelgende, shalliwétilgen urchuq, zawutlarni yötkep kélip shayar nahiyilik hökümetke sétip berdimu yaki "xungli", "fuxung" shirketliri shayarda toqumichiliq fabrikisi qurup, yerlikke baj tapshurush sheklide sana'et tori berpa qilmaqchimu?
 
Hörmetlik muxbir ependim, muxbir xanim, sorap baqaylichu? siler bu xewerni yazghanda, zawut qurulghan yerge paskinichiliqmu bille yitip kélidu. Paxta botqisini ximiyilik yasashqa toghra kélidu. Renglik toqushqa ximiyilik reng ishlepchiqirishqa toghra kélidu, undaqta kichikkine shayar nahiyisi bu paskinchiliqni ékologiyilik bir terep qilishta némige tayinidu? dégen mesilini oylap kördünglarmu? urchuqlargha egiship yétip kélidighan xitay köchmenlirini shayar nahiyilik hökümet qeyerge orunlashturidu? köchmen xitay bilen ichkiri ölkilik xitaylar toxtam tüzüp, Uyghur yurtlirida zawut quridighan bolsa, erzan emgek küchlirinimu ichkiri xitaydin yötkep kélishi, erzan Uyghur emgek küchlirini mustemlike Uyghuristandin ichkiri xitaygha yötkep kétishi kérekmu yaki Uyghurlar ishchiliqqa qobul qilinishi kérekmu? bu so'algha muxbirlarla emes, yéngi sékrétar jang chünshyenmu jawab bérelmeydu.

Qarighanda, oyghiniwatqan köchmen xitay puqralirining gürjek bilen déhqanchiliq qilip, mustemlike Uyghuristanda bay bolushqa közi yetmigen bolsa kérek, shunga mustemlike Uyghuristan'gha déhqan köchmen bolup köchüp kirishtin bash tartqan bolsa kérek, xitayning aqqun ishchiliri shinjin shehiride ayliqi 5 - 6 ming yüen'ge ishlewatqanda, qaysi xitay séwet, epkesh kötürüp déhqanchiliq qilish üchün "shinjang"gha kélidu? kelsimu waqitliq kélidu, kétip qalidu. Éhtimal xitayning köchmenlirini shayargha yerleshtürüsh zörüriyiti, muhit bulghaydighan zawutlarni ichkiri xitaydin shayargha yötkep kélish zörüriyiti, xitayning 19 ölkisi mustemlike Uyghuristanni parchilap bashqurush zörüriyiti, Uyghurlarning nopus terkibini özgertish zörüriyiti "shayarni sana'etleshtürüsh"ke mejbur qilghan bolsa kérek.
 
Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.