Сериқ торна равиқида көргән чүш

2009 - Йиили 9‏ - айниң 3‏ - күни үрүмчидә йәнә намайиш партлиғанлиқи тоғрисида б б с вә башқа хитай тили тор бәтлири хәвәр тарқитишқа башлиди, үрүмчи сайбағ районлуқ башланғуч, оттура мәктәпләрдә ваксина уруп зәһәрләнгән уқуғучилар арисида өлүм - йитим болғанлиқи тоғрисида хәвәрләр тарқилишқа башлиди.
Обзорчимиз сидиқ һаҗи рози
2009.09.04

Үрүмчи вә пүтүн мустәмликә уйғүристан әнсизлик вә вәһимә ичигә чүшүп қалди. Буниң ичидә көчмән хитайларниң вәһимә ичигә чүшүп қалғанлиқи һәддидин зиядә болуп, 9‏ - айниң 3‏ - күни миңлиған хитай кочиға намайишқа чиқип, җәмийәт тәртипини яхшилашни тәләп қилип ваң лечивәнниң тәхттин чүшүшини тәләп қилди.

7‏ - Айниң 5‏ - күни ялғуз үрүмчидила әмәс, 6‏ - күнидин башлап қәшқәрдә, хотәндә, ғулҗида һәтта қумулда зор көләмлик, мәһәлливи көләмлик намайишлар болғанлиқи, бирла қәшқәр шәһиридә 5 миңдин 6 миңғичә уйғур яшниң қолға елинғанлиқи тоғрисида, 5 йүздин артуқ кишиниң намайишқа чиққанлиқи тоғрисида хәвәрләр оттуриға чиқти, демәк, 5‏ - июл пүтүн уйғуристанда уйғурлар қозғилип, хитай көчмәнлири һакимийитигә вә бу һакимийәтниң мустәмликичи мәркизи һөкүмитигә қарши сияси қозғилаң көтүргәнлики тарихи һәқиқәт вә риал пакит болуп қалди.

7‏ - Айниң 5 - , 6 - күнлири пүтүн мустәмликә уйғуристан уйғурлириниң умумйүзлүк қозғилиши түнҗи иш болмисиму, лекин көләм җәһәттә интайин зор көләмлик қозғилиш булуп қалди. Әмди хитай һакимийитиниң уйғурларни қолға елишлири, бастурушлири карға яримиди дегән сөз. Әмди хитайниң қорқутушлири, попуза, тәһдитлири ишқа ақмиди дегән сөз.

Җәмийәт тәртипиниң бузулушиға бу қетим "зәһәрлик жиңнә вәһимиси" сәвәб болдиму? бу тоғрида америка бирләшмә агентлиқи хәвәр тарқатқанда: "зәһәрлик жиңнә вәһимиси"гә, "жиңнә санҗиш партийиси" дәп, исим қойди. "Жиңнә санҗиш партийиси"ни тәшкиллигүчиләр кимләр? бу партийиниң милләт тәркипи тоғрисида хитай көчмәнлири һакимийити җүрәтлик бер еғиз сөз қилалмиди.

Һеч ким зәһәрлик жиңнә тоғрисида чүшәнчә бәрмиди. Жиңнә санҗип җараһәтләндүрүлгән адәмләр бушүн тор битидә 460 нәпәр, уйғүр биз тор битидә 500 нәпәр дейилди, йәнә башқа тор бәтлиридә 1000 ға йитип бариду дейилди. Жиңнә санҗилған адәмләр хитай, уйғур, қазақ, туңган, муңғул дейилди, қариғанда аталмиш 13 милләтниң һәммисигә жиңнә санҗилған охшайду. Бу зәһәрлик жиңнә қандақ тәйярланғанду, бир адәм тәйярлап тарқатқанмиду? бу жиңнә химийилик зәһәрлик дорилар билән суғурүлған жиңинмиду яки әйдиз кесилини давалашқа ишләткән, ташливәтмәй сақлап қоюлған жиңнимиду? чүшәнгини болмидиғу, бу дуняниң ишлирини?

Миң адәм, 5 йүз адәмгә санҗилған 5 йүз тал яки 1000 тал жиңнимиду? ениқи шу болдики, сайбағ районида оқуғучиларға ваксина урулди. Ваксина урушниң пәсил тәртиплири болатти. 8‏ - Айда ваксина уруш, бу қандақ тәртип болғийди? 7‏ - айниң 5‏ - күни уруш чеқиш, булаш, от қоюшни беҗиргүчиләр һөкүмәт тәшкиллигән җасуслар икәнлики тоғрисида хәвәрләр тарқилишқа башлиди.

Зәһәрлик жиңнә яки "жиңнә санҗиш партийиси" ни тәшкиллигүчиләр ким болуп чиқиши мумкин? оттура мәктәп оқуғучилириға ваксина урушни ким тәшкиллигән болуши мумкин? секретар ваң лечивәнниң аталмиш шинҗаң уйғур аптоном райониға һөкүмранлиқ қилиш вастилири, һийлә - микирлири ахирлишип қалғандәк туриду. Мустәмликә уйғуристанда уйғурлар контроллуқтин чиқип кәтти. Барлиқ тәртипләр һәрбий куч астиға илинди.

Өзиниму алдайдиған вә башқиларниму алдайдиған шәкилдә оттуриға чиққан шовинизм - хитай милләтчилики ‏- бу хил җараһәт, бир һөкүмран милләтниң қериғанлиқиниң вә бир һөкүмран милләтниң һалакәткә йүзләнгәнликиниң аламитидур. Қисқиси ваң лечивәнниң мустәмликә уйғуристанға һөкүмранлиқ қилиши сериқ торна равиқида олтуруп ухлимай көргән чүш булуп қаламду, қандақ?

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.