Nur bekri musulman wetenperwer diniy zatlarni terbiyilimekchimu?

2010 - Yili 10 - ayning 9 - küni "tengritagh " tor bétining muxbiri wang "aptonom rayonluq 2010 - yilliq musulman wetenperwer diniy zatlarni 1 - qararliq terbiyilesh kursida 8 - öktebir oqush bashlandi" mawzuluq xewer tarqatti. Xitay bilen nur bekri némini keship qilmaydu, emdi "musulman wetenperwer" deydighan uqum otturigha chiqiptu.
Obzorchimiz sidiq haji rozi
2010-10-12
Élxet
Pikir
Share
Print

Nur bekri kursantlargha notuq sözligende: "shinjangni muqimlashturush (démek, "shinjang" muqim emeskende, chünki, 09 - yili 7 - ayning 5 - küni tengritagh ornidin qozghilip ketti,de!) xelqni béyitip, chégrani muqimlashturush" dep körsetti.

"Xelqni béyitip " dégen bu ibarini qandaq chüshensek bolar? 1950 - yili maw zédung shundaq chaqiriq qilghanidi, kéyin mustemlike Uyghur dölitide minglighan, on minglighan Uyghur achliqtin öldi. Kéyin ding shawping "bir qisim kishiler awwal bay bolushi kérek "dégen idi. Xitay köchmen sodigerning "gu'angxuy shirkiti" öy - imaret tijaritidin halqip chiqip qumul ara türkning nom yézisida kömürkan rayoni achti. Yéqindin bashlap kömür - qara altun xitayning poyiz, aptomobiligha qachilinip xitaygha toshulushqa bashlidi. Gu'angxuychilardin burun tijaret bashlighan oghlum alim abduréhim 7yilliq qamaq jazasi élan qilinip türmide yatti.

"Xelqni béyitish" dégen uqumning mezmunigha emdi bu yerde néme dep tebir bersek bolar nur bekri? kembeghel ademler uningdinmu qorqup, buningdinmu qorqup yashaydu, bu kishiler özlirini we özliri yashawatqan jem'iyetning muhitini özgertishke qilchimu qiziqmaydu. Chünki, majali yetmeydu. Kembeghel ademler gadaylashqanséri qalaq, en'eniwi, konsérwatip idiyiler ularning wujudida shunche muqimlishidu, bu hal tebi'iyki, jem'iyetning muqimliqini saqlashqa intayin paydiliq. Bu siyaset xitay mustemlikichilirining mustemlike Uyghuristan'gha qaratqan 61 yilliq siyasitidur. Bu yerde nur bekri yuqiriqi siyasetni "xelqni béyitish" dégen niqab bilen niqaplawatidu.

"Xelqni béyitish "deydighan niqap bilen diniy zatlarni aldash bu qétim nur bekrige tapshurulghan alahide wezipe bolsa kérek.

Tor betlirining xewerlirige qarighanda, hazirqi zamanda xitayning 1000 yüenlik pulining qimmiti 1980 - yillardiki 28 yüen pulning qimmitige barawer bolup qaptu. Shundaq bolghanda 4ming yüen ma'ash alidighan bir Uyghur, hetta xitay puqraliriningmu 80 - yillardiki 120 yüen'ge ishlewatqanliqi ashkara bolidu.

60 - Yillargha sélishtursaq, bir kilogram göshning puli 9 mochen idi. Emdilikte bir kilogram göshni 50 yüen'gimu sétip alghili bolmaydiken. "Xelqni béyitish "dégen bu ibarining tebirini qandaq chüshensek bolar nur bekri? "diniy mesile shinjangning muqimliq ishlirida barométirliq rol oynap kelgen" deydu nur bekri. Barométir dégen qandaq métir u nur bekri? "muqimliq" ni métirlap ölcheydighan bolup qaldinglarmu yaki muqimliqning hararitini hararet ölcheydighan eswablar arqiliq ölcheydighan bolup qaldinglarmu nur bekri?

"Dinni qanun bilen bashqurush "deydu nur bekri. Bu yerde ikki xil bashqurush shekli otturigha chiqidu. Islam dinini xitayning qanuni bilen bashqurush, ikkinchi Uyghurni xitay bashqurush. Dinni we diniy zatlarni terbiyilep bashqurushtin meqset néme ? diniy zatlar ichide gumashta, ghalcha teyyarlash, dinni xitayning siyasiti üchün xizmet qildurush, dinni sotsiyalizm üchün xizmet qildurush, diniy zatlarni bir - birini nazaret qilidighan mitige, qulaqqa aylandurush - nur bekri mensup bolghan köchmenler hakimiyitining meqstidur. Men, din qanunning sirtidiki hadise dep anglighan idim. Üstqurulmida din, qanun, edebiyat - sen'et, pelsepe qatarliq ang shekillirining ayrim - ayrim halda bir - birige xizmet qilmay, bir - birini bashqurmay musteqil turidighanliqini oqughan idim. Emdi bu yerde némishqa atalmish qanun dinni bashquridighan bolup qaldi nur bekri?

Xitay mustemlikichiliri Uyghurning en'eniwi medeniyet we jem'iyet qurulmisigha 61 - yil siyaset we zorawanliq bilen hujum qildi. Lékin hazirghiche héchnéme qilalmidi. Emdilikte zorawanliqni ashkarimu - ashkara yolgha qoydi, baldaqmu - baldaq örletti.

Xitay mustemlikichiliri showinizm milletchilik siyasitini Uyghurlargha qaratqanda, Uyghurning étnik millet qurulmiliq alahidiliki Uyghur tili, Uyghur medeniyiti we diniy étiqadini tamamen yoqitishni meqset qildi. Bundaq ehwalda Uyghurlarning qarshiliq körsitishi ber heqtur.

Toluq bet