Mukapat lyu shawbogha bérildimu yaki wén jyabawgha bérildimu?

2010 - Yilliq nobil tinchliq mukapati xitay kishi lyu shawbogha bérildi. Sélishturup köreyli, rusiyide saxarop nobil mukapatining sahibi bolghandin kéyin kishilik hoquq üchün küresh qilish, qayta qurush jeryanida türtkilik rol oynap, sabiq sowétler jem'iyitining yimirilishide öchmes tarixi töhpilerni qoshqan idi. Lyu shawbo shundaq rol oyniyalishi mumkinmu?
Obzorchimiz sidiq haji rozi
2010-10-19
Élxet
Pikir
Share
Print

Amérika awazida 12 - küni élan qilin'ghan sélishturma xewerning mezmunigha asaslan'ghanda, kuba, winsu'ilaning dölet rehberliri béyjingni qollap, lyushawboning mukapat élishigha qarshi turdi. Lékin béyjing bu qétimliq mukapatni qolgha keltürüsh üchün qanchilik tirishchanliq körsetti...? kallisi koldurlap ketkenler oylap qoymamdikine?! "2008 nizamnamisi" yézilghandin kéyin, tor betliride bir heptimu turalmidi. Nechche ming adem qollidi déyildi, qéni bu ademler emdi?
 
Bu nizamnamining ademlerning éngida héchqandaq tesiri qalmidighu?

Rusiye agénitliqi 10 - ayning 10 - küni nopuzluq obzorchi nikolay térotiskining "nobil tinchliq mukapati tinchliq üchün küresh qilidighan qoralmu?" mawzuluq maqalisini élan qildi. Aptor maqaliside nobil tinchliq mukapati komitétining besh neper ezasini tenqidlep: "amérika, natu, gherbiy yawropaning belgiligüchi tesirige yoluqqan" dep körsetti. Rusiye metbu'atliri: "nobil tinchliq mukapati gherbning siyasi qoraligha aylinip qaldi" dep körsetti. Aylinip qalsighu meylidi, mukapatni kimge bérish mesiliside nobil tinchliq mukapati yene bashqiche siyasi qoralgha aylinip qaldi.

10 - Ayning 12 - küni "xelq'ara axbarat xizmetchiliri birleshmisi" bayanat élan qilip: "mukapatning lyushawbogha bérilishi, junggoda axbarat erkinlikini ilgiri sürüshke paydiliq" dep körsetti. Epsuski, junggo mesilisi boyiche mendin beter axmaq ademlermu yashaydikina, bu dunyada!

Junggo tashqi ishlar ministirliqining bayanatchisi ma chawshü: "mukapat élish junggoning siyasi tüzümining nishanigha tesir körsetmeydu", dep körsetti. Mana bu gep jingda toxtaydighan gep. Biz Uyghurlar xitayni bilimiz, romantik gherblilkler xitayni bilmeydiken.

Nobil tinchliq mukapati kimge bérildi, lyu shawboghimu yaki wén jyabawghimu? mukapatni kimge bérish élan qilin'ghuche wén jyabaw dölet ichi we xelq'ara jem'iyette bolup 8 qétim démokratik siyasi silahat toghrisida notuq sözlidi. Axirqisi amérikining simliq téléwiziyisige sözlep bergini - pikir erkinliki toghrisida bolup, hemmidin muhim notuq idi. 300 Neperdin artuq xitay ziyaliysi xet yézip, mukapatning lyu shawbogha bérilishini ümid qilishti. Bu kishiler xitay démokratliri, xitay ziyaliyliri hésablinamdu yaki bu kishiler...(?)

2010 - Yili dunya Uyghur qurultiyi xelq'ara jem'iyette aktip pa'aliyet qilghan bir yil bolghan idi. Bu yil nobil tinchliq mukapatining Uyghurlargha bérilishi éhtimalgha yéqin, bekmu yéqin bir ish idi.

7 - Ayning 8 - küni norwégiyide bir Uyghur térror gumandari tutuldi... Men yénimdikilerge uyghürlargha kéliwatqan nobil mukapatining yoli bügün tosulup qaldi, dédim.

7 - Ayning 9 - küni norwégiye da'iriliri qolgha élin'ghan elqa'ide ezalirining amérika we en'giliyidiki térrorluq pilani bilen chétishliqi barliqini bildürdi. Kötürüp qopalmighudek chong gepqu, bu?

9 - Ayning 28 - küni norwégiyide tutup turuluwatqan térror gumandarliridin béri daniyidiki bir gézitxanini partlitishni pilanlighanliqini étirap qilghan déyildi.

9 - Ayning 30 - küni norwégiyidiki térror gumandarliridin rashidin memet (Uyghur) hujum nishanining xitay ikenlikini bildürgen déyildi....

Kéyinki 7 kün nobil mukapatini kimge bérish toghrisida qarar chiqiridighan 7 kün idi. Xelq'ara jama'et pikri shundaq teyyarlandi, bu pilan rashidin memetning pilanimu yaki elqa'idening, yaki xitay bilen elqa'ide birliship shundaq pilanlighanmu?

Qérindishim, sizningche lyu shawbo bilen xitay hökümiti bashqa - bashqa nersimidi, qaysi démokrat xitay Uyghurlargha köngüldikidek ipade bildürgen idi?

Ependiler, bu mukapatning xitaygha bérilishi Uyghurlarni hésabattin chiqiriwétish bolup qalamdu, yoqmu? bichare Uyghurum, nadan Uyghurum, Uyghurlar, Uyghurning düshmini emes idighu? nobil tinchliq mukapati lyushawbogha bérilgendin kéyin ongchi we solchi xitaylar jim - jit bolup ketti. Chünki ular yéngiwaldi‏ - de!

10 - Ayning 11 - küni xu jintaw wang léchüenni, shinyangdin lyu shawbo yatqan türme jaylashqan jinju wilayitige ewetti. Lyu shawboni jinjudiki türmidin béyjingdiki chinchéng türmisige yötkep kelmekchi boldi... Wang léchüen yötkep kelmekchi boldi... Bu némidin dérek béridu qérindishim? 61 yil xorlan'ghan Uyghurum héchqachan bügünkidek xorlanmighan idi.

Biliwalduq, séning mahiyitingning esli zadi néme ikenlikini toluq biliwalduq, dunya!!!
 
Toluq bet