Xarabiliqtiki bir késekni éliwetti néme boldi ...

Wang léchüenning texttin chüshkenliki hergiz mustemlikichi xitay partiyisining texttin chüshkenlikidin dérek bermeydu. Shunga wang léchüen yaki xu jintawning, yaki ju yüngkangning quchiqigha chüshken bolidu.

Herbiy ishlar komitétining re'isi buyruq chüshürmey turup bir xitay esker mustemlike Uyghur jem'iyitide bir pay oq chiqiralmaydu.

Siyasi qanun komitétining bashliqi ju yüngkang buyruq chüshürmey turup, bir xitay saqchi mustemlike Uyghur dölitide bir pay oq chiqiralmaydu. Wang léchüen peqet jungnenxey belgiligen siyasetni ijra qildi xalas.

2009 - Yili 7 - ayning 7 - küni wang léchüen téléwiziye nutqi sözlep, xitay köchmenlirige yel bérip, xitay köchmenlirige ishench ata qilghanda, tor bétige chiqqan nurghunlighan xitay milletchiliri, "Uyghurlarni qattiq basturush kérek, xuddi eyni chaghda wang jin basturghandek basturush kérek" déyishken.

Eyni chaghda mawzédung générali wang jinni mustemlike Uyghur dölitige ewetip: zu zungtang Uyghurlarni basturghandek basturushqa siyaset belgilep bergen. Wang jin shu siyasetni ijra qildi. Ijare kémeytish, yer islahatida Uyghurlarni basturdi, 1962 - yili ili qozghilingini basturdi. Kéyin shi jungshünni gherbiy shimalgha ewetip xitayning merkizi komitétini aqlap, basturush "xataliqi"ni wang jin'gha artip qoyghan we wang jinni yötkep ketken idi. Bu qétim wang léchüen yötkep kétildi. Uning emilini élip tashlamdu, tashlimamdu, xarabiliqtiki bir késekni éliwetti néme boldi, éliwetmidi yene néme boldi, oxshashla bir gep.

4 - Ayning 24 - küni "shinjang xizmet yighini"da shi jinping: "wang léchüen siyasi jehette qet'iy, partiyige sadiq, shinjangning tereqqiyati we muqimliqi üchün zor töhpilerni qoshti" dédi. Wang léchüen ölgende yene shu merkizi komitét, depne murasimi ötküzüp: partiyimiz, armiyimizning uzaq sinaqlardin ötken yaxshi kadiri idi, ulugh prolétariyat inqilabchisi idi, deydu babawshen'ge apirip köydüridu xalas.

Xitayning nadan milletchiliri tarqatqan öseklerde, eyni chaghda wang jin mustemlike Uyghur dölitide basturush wezipisini ada qilip bolghandin kéyin, "wang jin kéliwatidu dése, böshüktiki balilarmu tinch uxlaydiken. Wang léchüenmu wang jindek bolushi kérek," déyishti. Xitayning rengwaz milletchiliri wang, janglarni ulughlap yene qandaq öseklerni otturigha chiqiridu, bu elwette kéyinki bir ish.

Men éytip qoyayki, bu xitay milletchilirige, xitaydin u qorqishi, bu qorqishi mumkin, xitaydin u dölet qorqishi, bu dölet qorqishi mumkin. Lékin, xitaydin qorqmaydighan dunyada bir millet bar. U bolsimu Uyghurdur. Xitaydin qorqudiken u Uyghur emes. Yéqinda ushbu radi'oning axbarat xewiride anglitilghan "qudretlik bomba" mawzuluq maqalide medhiyilen'gen alimjan, ötken yili 7 - ayning 7 - küni ürümchide oq chiqiriwatqan xitay saqchilirining aldigha qingraq élip yügürgen ikki neper Uyghur yigitning baturluqi Uyghurning xitaydin qorqmaydighanliqining delilidur.
 
Batur xelq hetta düshmini bolsimu qoralsiz ademge oq chiqarmaydu, eksiche, qorqunchaq xelq gerche hökümran bolsimu, qolida tömürning sunuqi yoq milletke, namayishqa chiqqan ayallar - balilargha oq chiqiridu. Bu pakittin éytqanda, heqiqiy qorqunchaqlar del xitay hökümranlirining özidur.

Wang léchüenni emilidin élip tashlamdu yaki etiwarlap ishlitemdu, bu ishning Uyghur bilen néme alaqisi bar?