Ottuz yil we on sekkiz kün

Shu qatarda armiyimu til uqidighan armiye, saqchilarmu misirning saqchiliridek gherez uqidighan saqchi bolushi kérek iken. Mustemlike ellerde gherez uqmaydighan, armiye, ortaq tili bolmighan saqchilar namayish qilghuchilarni basturidiken. Mesilen, ürümchide xelq meydanida Uyghurning qéni töküldi. Misirning qahire shehiride, iskendiriye shehiride inqilabchi xelq tankilarning üstige chiqiwélip bayraqlirini lepildetti.

Qahire shehiri némila bolsa öz dölitining shehiri, mustebit bolsimu misir hökümitining jaylashqan shehiri idi. Ürümchi shehiri, mustemlikichiler hökümranliq qiliwatqan sheher idi.

Qa'ide boyiche, eslide hökümet qurulghan haman xelq bilen munasiwet ornitalaydu. Misir hökümiti misir xelqining hökümiti idi.

Shu xelq mubarek ependini ottuz yil qayta-qayta saylighan idi. Emdi hökümet xelqqe kérek bolmidi, almashturushqa toghra keldi.

Xelq inqilab we namayish arqiliq hökümetni aghdurup tashlidi.

Xitay köchmenliri hakimiyitining hökümiti bilen Uyghur xelqining héchqandaq alaqisi yoq. Bu yerde hökümet bilen puqralar munasiwiti deydighan munasiwetmu yoq. Chünki, Uyghurlar köchmenler hökümitini saylap chiqqan emes. Boysundurulghan Uyghurlarni dawamliq herxil jinayetlerni toqup chiqip basturush bu, xitay köchmenliri hakimiyitining kündilik ish tertipidur. Shunga, ürümchide inqilab basturushqa duchar boldi. Shunga misirda inqilab ghelibe qildi.

Hökümet hoquqluq terep. Bir adem yaki bir guruh buyruq qilalaydighan hoquqqa érishken haman, bashqilar we puqralar buyruqqa boysunushqa mejbur bolidu. Özining arzulirini mesilen, basturush arzulirini hoquq arqiliq ipadilesh, xitaydek mustemlikichi dölette, exlaqning, qanunning sirtidiki bir ish bolup qéliwéridu.

Undaqta, hoquq bilen boysundurushning chéki qandaq bolidu? bundaq chekke siz we biz her qedemde duch kélimiz. Bundaq chekni adalet prinsipi dep atashqa toghra kélidu. Esli qa'ide boyiche, meyli puqralar bolsun, basturushqa duch kelgende yaki hökümet basturushqa mejbur bolghanda, weqelerge adalet prinsipi boyiche mu'amile qilishqa toghra kéletti, oxshashla her ikki terep adalet prinsipigha emel qilishqa toghra kéletti. Mesilen, misirda saqchilar we armiye namayishchi xelqqe adalet prinsipi boyiche mu'amile qildi. Emma, ürümchide,xitay hakimiyiti 31 ölke, sheherdin esker yötkep kélip Uyghurlarni basturdi.

Ürümchide Uyghurlar hökümetke yumshaq bésim ishletkendek, misirdimu puqralar hökümetke yumshaq bésim ishletti. Emma, ikki xelqning teqdiri ikki xil qismetke ige boldi.

Hoquq we hakimiyet bir jem'iyette xelqning ijtima'iy parawanliqini kapaletke ige qilalighan chaghdila hökümet qanunluq hökümet, hakimiyetmu qanunluq hakimiyet bolup hésablinidu. Bundaq chaghda omumi puqra étirap qilghan hakimiyet tüzgen qanun, puqralar emel qilishqa tégishlik qanun bolup qalidu. Puqralarning ijtima'iy parawanliq telepliri kapaletke ige bolmighan haman misirdek,tunistek döletlerde qanunni, tertipni bir terepke chörüwétip inqilabning partlishi eqilge muwapiqtur.

Uyghurlar qarshiliq körsetken hökümet mustemlikichi hökümet bolsa, misir xelqi qarshiliq körsetken hökümet mustebit hökümettur.

Tebi'iy kishilik hoquq we ijtima'iylashqan kishilik hoquq perqliq bolidu. Shundaq ehwalda, tebi'etning meqsetlirige, ijtima'iy jem'iyetning meqsetlirige xilapliq qilghan hakimiyet tüzgen qanun adaletsiz qanun, shundaq hakimiyet teshkilligen tertip adaletsiz tertip bolup qalghanda, puqralar bilen hökümetning munasiwiti zorawanliqni wasite qilishqa aylinip qalidu,de! puqralar qarshiliq körsitishke hoquqluq bolidu.

Shunga, misirda ottuz yilliq mustebit hakimiyet xelqning inqilabi arqiliq on sekkiz künde aghduruldi.