"Шумлуқниң аламити"му ?

"Җуңгода 6 - айдин башлап, иш ташлаш, мааш өстуруш долқуни көтүрүлди. Йеқинда хитай пулиниң курси көтүрүлүш билән биргә, дунявий ширкәт һесабланған, адәм кучи мәнбии ширкитиниң иҗраийә рәиси җип җоррис, америка ширкәтлири җуңгоға мәбләғ селиш пиланини қайта ойлишиши мумкин, йеқиндин бери бир қисим бир қәдәр чоң чәтәл ширкәтлири җуңгодин чекинди, чүнки дейишти кәсипдашлар, бу ширкәтләрниң хоҗайинлири җуңгода бир шумлуқниң аламитини көрүп йәтти" дәп көрсәтти" дейилди мақалидә.

Җуңгода мәвҗут булуватқан капитал билән әмгәкниң мунасивити мақалидә мундақ тәсвирләнди: 6 - ай киргәндин башлап пушикаң вәқәсидин кейин, японийиниң хонда, тойота ширкәтлириниң җуңгода қурулған завутлирида, җухәй районидики чәтәл завутлирида, чаңҗяң вадиси, 3 - делта районида қурулған японийиниң никун ширкитидә арқа - арқидин иш ташлаш вәқәлири йүз берип, хәлқарада җуңгоға мәбләғ салғучиларни чөчүтивәтти. Асасий қатламда узундин бери көмүлүп қалған ишчиларниң әмгәк һәққи билән капитал тәрәпниң позитсийиси ашкарилинип гәвдилинишкә башлиди.

Қариғанда, җуңго җәмийитидә ишчи билән хоҗайинниң мунасивити, капитал билән әмгәкниң муна сивити болуп оттуриға чиқиқандәк қилиду. Муәййән әмгәк җәряни һәм капиталистниң тәләплирини қанаәткә игә қилиши һәм ишчи, әмгәкчиләрниң тәләплирини қанаәткә игә қилиши керәк болиду. Җуңгода ишчиларниң мааш өстурушни тәләп қилғанлиқи ноқул һалда мадди мәнпәәт тәләплирини қандурушни тәләп қилғанлиқила әмәс. Бәлки, ишчиларниң әмгики мадди қиммәт яратқанда, шу ишчиниң яки адәмниң мәнивий қиммитиниму яритиши керәк болғанлиқтин, җуңгода ишчилар ойғинип һәм мааш өстүрүшни һәм әмгәк шараитини яхшилашни тәләп қилишқа башлиди. Шуңа җуңгода оттуриға чиқиватқан әмгәк һәқ - һоқуқ мәсилилири бир қисим америка ширкәтлириниң хоҗайинлирини ойландуруп қойди.

Җуңго ишчилириниң ойғиниши пәқәт чәтәл ширкәтлиригә ишчи болуп киргән җуңголуқларниң ойғиниши болуп қалди. Җуңгониң дөләт игиликидики завут - карханиларниң ишчилири техи ойғинип мааш өстурушни тәләп қилғини йоқ. Мубада чәтәл ширкәтлири билән җуңго ишчилири оттурисидики талаш - тартишлар мааш өстурушни тәләп қилишқа бағлинип қалидиғанла болса, әрзан әмгәк кучлиридин пайдилинип тәрәққи қилишни көзлигән чәтәл ширкәтлириниң тәрәққи қилишиму қийинчилиққа дуч келиду.

Җуңгодин чекинмәй башқа амал тапалмайду. Шу вақитқа йәткәндә, пәқәт екиспортқа тайинип тәрәққи қиливатқан җуңгониң иқтисади қандақ зәрбигә дуч келидиғанлиқини тәсәввур қилғили боларму?

юқиридики улиништин бу прогирамминиң тәпсилатини аңлиғайсиләр.