Үч күн ичидә немиләр болуп өтти?

1-Айниң 26-күнигичә үч күн бурун дегүдәк, хитайниң рәиси ху җинтав вашингтонни зиярәт қилди. Дағдуғилиқ күтүп елинди. Гәрчә, хитайпәрәс сумурғ телевизийисиниң муһакимичилири ички сәвәбләр түпәйли ху җинтавниң америка зияритини "деһқан карханичиниң шәһәргә кирип қассапниң йенида туруши" дәп һақарәтлигән болсиму, лекин ху җинтав америкида қизил гиләмгә пут қойди, америкидин күткән йүз хатиригиму еришти.

24-Күни москвада партлаш йүз берип демократик русийигә еғир талапәт йәткүзди. Йәнә 24-күни йеңила вашингтондин қайтип кәлгән хитай дөләт комиссари дәй бинго әпәнди. Русийә, хитай 5-қетимлиқ "истратегийилик чүшәнчә һасил қилиш " учришишиға қатнишиш үчүн москвада пәйда болди. 28-Күни дәй бинго йәнә зиярәт үчүн бейҗиңға йитип кәлгән америкиниң муавин дөләт ишлар катипи ситан борг билән җуңнәнхәйдә йүз көрүшти.

Туниста партлиған ясимәнгүл инқилабидин кейин, мисир, иорданийә, маракәш, мавританийә қатарлиқ әрәб дөләтлиридә өзини көйдүрүвалғучилар оттуриға чиқти. Оттура асияда афғанистан, оттура шәрқтә йәмән, ирақ қатарлиқ дөләтләрдә һөкүмәткә қарши һәпирәңгүл инқилаби партлиди.

25-Күни мисирниң қаһирә шәһиридә партлиған ақчайгүл инқилаби 27 ‏-күни 1000дин артуқ киши қолға елинсиму бесиқмай 28-күнигә йитип кәлгәндә намайиш мисирда омумйүзлүк ақчайгүл инқилабиға айлинип һөкүмәт, тор бити вә телефон алақилирини үзүп ташлиди.

Дөләт ишлар катипи һиларий ханим 2009-йили үрүмчидә уйғурлар қозғиған, хитайлар бастурған намайишқа ипадә билдүрүп, "һәр икки тәрәпниң өзини тутувелишини тәләп қилған " дәк, бу қетимму мисирдики намайишқа бағлиқ һәр қайси тәрәпләрниң еғир-бесиқ болушини тәләп қилди.

1-Айниң 26-күни "дувий тор бити" ху җинтав билән обаманиң учришиши америкиниң нәзиридә әмәлий әһмийәткә игә болмиди" мавзулуқ мақалә елан қилип, 1-айниң 24-күни" вашингтон почтиси гезити"гә имзалиқ мақалә язған роберт самилсунниң көз қарашлирини тонуштурди. Аптор : америка билән хитайниң нишани түптин охшимайду, америка сода-тиҗарәт қилиш арқилиқ иккинчи дуня урушидин кейинки дуняниң тәртипини кеңәйтмәкчи болиду, хитай болса, йеңи, бәлки өзи хоҗайин болидиған дуня тәртипини турғузмақчи болуватиду"дәп көрсәтти.

Йәмәндә инқилабчилар президент мәмәт салиһниң тәхттин чүшүшини, мисирда инқилабчилар һөсни мубарәкниң тәхттин чүшүшини тәләп қилишти.

Безиләр, туниста партлиған ясимәнгүл инқилабини, йәмәндә партлиған һәпирәңгүл инқилабини, мисирда партлиған ақчайгүл инқилабини, маракәш, иорданийидә партлиған намазшамгүл инқилабини "мәдәнийәтләр тоқунуши" мавзулуқ китабта көрситилгәндәк, "4-қетимлиқ демократийә долқуни "йитип кәлди дейишсә, йәнә безиләр, бу инқилабларниң хантиңтүн оттуриға қойған "демократийә долқуни" билән һечқандақ алақиси йоқ, бу инқилабларни яхшиси "бир қача қордақ" үчүн көтүрүлгән инқилаб дегинимиз түзүк дейишти.