Nege barisiler Uyghur yashliri!

Yéngi xewerlerdin melum bolushiche, mektep püttürgen, emma ishsiz qalghan bu oqughuchilarni ichkiri xitaygha élip kétip“ Terbiyilimekchi ” bolghan xitay hökümiti, xotendin 369 neper oqush püttürgen oqughuchini, qeshqerdin 1476neper oqush püttürüp ishsiz qalghan oqughuchini, ili-ghuljidin mektep püttürüp ishsiz qalghan 3500neper oqughuchini tizimlap, poyizgha qachilap ichkiri xitaygha yötkep kétip “ Terbiyilimekchi ” boldi.

Xitay mustemlikichiliri awwalqi dewrlerde, Uyghurning yash-yash qizlirini ichkiri xitaygha yötkep kétishni ishqa ashurghan bolsa, kéyinki dewrlerde Uyghurning erkeklirini ichkiri xitaygha yötkep kétishni ishqa ashurghan bolsa, emdilikte Uyghurning oqughuchi- ziyaliylirini ichkiri xitaygha yötkep kétishni pilanlidi. Kelgülük emdi Uyghur ziyaliylargha keldi.

Uyghurlarni tarqaqlashturush awwal isyankar ölke qeshqerdin bashlandi. Uningdin kéyin Uyghurlarni tarqaqlashturush qehriman ölke ilidin bashlandi. Ili wilayitide Uyghurning tétir, térilghu yerliri xitay köchmenlirige teqsim qilip bérildi. Qeshqer wilayitide qeshqer kona sheherni chéqip, olturaq öy sélip xitay köchmenlirini köchürüp chiqti. Ili nahiyiside Uyghurning yerlirini, mesilen, turpanyüzide Uyghurning bagh-waranlirini xitay köchmenliri tartiwaldi. Pilanliq tughut siyasitini téximu sistémilashturup, Uyghurning mehelle ‏- közliride Uyghurni bir -birini nazaret qilidighan qaranchuqqa, qorsaq kötürgenlerni xitaygha chéqip qoyidighan chéqimchigha aylandurup, tughut chekleshni dehshetlik bir heriketke aylandurdi.

Uyghur, qazaq charwichilarni yaylaqtin ayrip tashlidi. En'eniwi turmush aditini özgertishke mejburlap, charwichiliqtin déhqanchiliqqa ötüshke zorlidi.
2009-Yili ürümchide kötürülgen namayish xitay zorawanliqining yuqiriqidek ipadilirige qarshi kötürülgen namayish idi. Shu yili xitay mustemlikichiliri 40tin artuq Uyghur yashqa ölüm jazasi berdi. Qisqisi Uyghurni yoqitishning qaysi shekli ünümlük bolsa shundaq charilerni ishlitiwerdi.

Emdilikte ereb islam elliride alemshumul démokratik özgirish boluwatqan künlerde, bu inqilabning junggogha yitip kélishidin ensirep, puti köygen toxudek bir halgha chüshüp qalghan xitay mustemlikichiliri, yasimen'gül inqilabining Uyghurlar ichide qozghilishidin ensirigen jungnenxey, mustemlike Uyghuristanda saqchilar herikitini jiddiyleshtürüpla qalmay, yene 4 neper Uyghurgha ölüm jazasi bérip, Uyghurlar ichide wehime peyda qilip, Uyghurlarni qorqutup, Uyghur oqughuchi- ziyaliylirini ichkiri xitaygha yötkep kétish pilanini élan qilip, yuqiridin- töwen'giche Uyghur jem'iyitige wehime tarqitip, namayishning aldini almaqchi, yasimen'gül inqilabining aldini almaqchi boluwatidu. Bu inqilabni yene, Uyghurlarning bashlap bérishidin ensirewatidu. Mushundaq chaghda wetenni tashlap yaqa yurtqa nege barisiler Uyghur yashliri, Uyghur ziyaliyliri!

Yasimen'gül inqilabi liwiye tiripolidin béyjing shehirige köchüp keldi. Yasimen'gül inqilabi misir qahiredin shangxeyge, gu'angjugha köchüp keldi. Ötken hepte 20- küni béyjing, shangxey qatarliq 13 sheherde yasimen'gül inqilabi bolup ötti. Emdilikte aldimizdiki yekshenbe xitayda 18sheherde yasimen'gül inqilabi bolmaqchi. Bu 18 sheherning ichide lixasamu bar, ürümchimu bar. Mushundaq peytte nege barisiler Uyghur ziyaliyliri!

Xitayning yasimen'gül inqilabchiliri “ Bizge ish kérek, bizge yémek-ichmek kérek ” dep sho'ar towlidi. Siler sendunggha baridikensiler, silerge sendungda yémek-ichmek teyyar turuptimu Uyghur ziyaliyliri, silerni béyjinggha élip kétidiken, silerge béyjingda ish orni teyyar turuptimu Uyghur ziyaliyliri, nege barisiler Uyghur yashliri, silerni xitay mustemlikichiliri ichkiri xitaygha yötkep ketmekchi boluwatidu, nege barisiler Uyghur yashliri!

Poyiz lenjudin ötüpla 3500neper Uyghurni bir yézigha orunlashturidu dep oylidinglarmu Uyghur yashliri? hey, nadan ademler,
Herbir Uyghurni birdin yétilep qaysi shirket achqan xitaygha qul qilip béridu, buni kim bilidu?