Wezir putin bilen wezir wén jyabaw béyjingda quchaqlashti

Rusiye we xitayda oxshashla saylam dewri yitip keldi. Xitayning hoquqluq izbasarmu körsitildi, rusiyining wezir bilen prézidénti almashturush pilanimu ashkarilandi.
Obzorchimiz sidiq haji rozi
2011.10.14
Share on WhatsApp
Share on WhatsApp

Xitayda bashliq bolghuchilar hergiz puqragha wede bermeydu. Emma rusiyide bashliq bolghuchilar puqralargha anche-munche wede bersimu, biraq hemmidin yamini rusiyide we xitayda hoquqi baqimendilik tüzümi héch qachan özgertilgini yoq.

Bu qandaqtur hoquqi baqimendilik, hoquqni monopoliye qilish kommunistlarning en'eniwi aditi bolup qalmastin belki hoquqi baqimendilik rus bilen xitayning milliy xaraktérining bir teripidur. Bolupmu rus bilen xitayning exlaq we qanunni bir terepke qayrip qoyup jem'iyetke küch bilen hökümranliq qilish xaraktérining bir teripidur.

Rusiyide bolidighan saylam xuddi u yanchuqtiki tuxumni bu yanchuqqa sélip almashturup qoyghandek bir ishtur.

Yawropada we gherb dunyasida kishiler rusiyining hoquq saheside boluwatqan özgirishlerge nezer tashlap, bundaq almashturushning démokratik saylamgha, partiyiler otturisidiki siyasiy riqabetning démokratik usulda élip bérilishigha haqaret qilghanliq dep qaraydighan bolsa, her halda bundaq köz qarashni xata dep qarighili bolmaydu.

Bu qétim wiladimir putin yenila yüzi qizarmighan halette hem yüzining chüshüp kétishining aldini élip, béyjingni ziyaret qilip, bir diplomatning qabiliyiti arqiliq söz- chöchek tarqitip, rusiyide ötküzülidighan saylamning jeryanigha gherb dunyasining soghuq nezer tashlishigha jawab bermekchi bolghan bolsa kérek.

Wiladimir putin'gha sir emes idiki, rusiyining xanliqliridin tartip char rusiye hakimiyitigiche, char rusiyidin tartip lénin, stalin rosiyisigiche hetta merhum yéltsin dewrigiche rusiyide bolup ötken tarixi siyasiy dawalghushlarda her qandaq bir chetke qéqilghan siyasiy kishi yaki siyasiy sergerdan kishi sibiriyige sürgün qilinishqa, étilip kétishke, türmide yétishqa razi bolghan idiki, hergiz xitaygha qéchip kélip siyasiy panahliq we siyasiy yardem tilimigen idi. Wiladimir putin bu qétim xitaygha kélip, xitay diplomatiyisi arqiliq özining xelq'arada siyasiy nopuzini tiklimekchi bolghan bolsa, méningche bundaq qiliq aléksandir néwskining milliti, tolstoyning milliti - rus millitining siyasiy en'enisige qilin'ghan haqarettur.

Amérika awazi tor bétide, “Rusiye rehberliri xitaypereslik siyasitini gherb dunyasining aldida ashkarilimaqchi bolghan bolsa biraq, rusiye rehberlirining xitay bilen bolghan munasiwetliride barghanséri arzugha chushluq dermanining yoqluqinimu ashkarilidi” dep körsetti. Rusiye gézitliri bolsa, “Nöwette rusiye rehberlirining kalte pemliki, kalte nezerliki, rusiyining xelq'ara ornini téximu töwenletti” dep körsetti.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.