junggoda torgha chiqquchilar qatilgha hésdashliq qildi. yang jiya palwandin yene birsi chiqti déyishti. bügünki künde junggoda heq bolsun, naheq bolsun keypiyatni jari qilish heriketliri, hökümetke qaritilghan yaki hökümetni arqa körünüsh qilghan heriketler bolup qaldi. puqralar xata qiliwatqini yoq. puqralar , ijtima'iylashqan menpe'et teleplirini ipadilesh yolliri tosulup qalghanliqtin biwaste menpe'et toqunushi arqiliq naraziliqini ipadileshke bashlidi.
junggo hökümiti bügün pichaqchi xitay térrorchilarning , "eksiyetchi küchler"ning, kishilik hoquqni qoghdighuchilarning , erz - shikayet qilghuchilarning qisqisi töt tereplik krizisning otturisida qaldi. ghezeplen'gen junggo puqraliri jungnenxeyge signal berdi.
"chingxu'a tereqqiyat munbiri" yéqinqi yillardin béri junggo jemiyiti "muqimliqni qoghdashning gheyri chembiriki ichige kirip qaldi . her derijilik hökümetler zor kölemde adem küchi, maliye küchi serp qilip muqimliqni qoghdighan bolsimu, biraq ijtima'iy ziddiyetler we ijtima'iy toqunushning miqdari azaymastin eksiche köpiyishke bashlap, melum menidin éytqanda, muqimliqni qoghdighanséri jemiyet shunche muqimsiz jeryangha kirip qaldi" dep körsetti. bu xil haletni "junggo yashlar géziti" 4 - ayning 19 - küni "yaman süpetlik dewr qilish" dep atidi. bügün'giche xu jintaw "qayghurush éngi" ni qayta - qayta tekitleydighan bolup qaldi.
chünki yuqiriqi ehwallar , junggoda hakimiyet béshidikilerning emeldarlar bilen puqralar otturisidiki toqunush weziyitide wehime, qorqush, alaqzadilik ichige chüshüp qalghanliqini körsetti.
mushundaq peytte, 2010 - yili 5 - ayning 21 - küni "boshün munbiri"de élan qilinghan "junggo bilen rusiye koriyide bir meydan urush qilishqa teyyarlandi, sherqi asiyada urush partlash aldida" mawzuluq maqalining axirqi abzasida: "nöwette junggoning iqtisadi sherqi asiyagha singip kirip , sherqiy shimali asiyaning belki buningdin kéyin pütün asiyaning iqtisadini bir gewdileshtürüshtin ibaret halqiliq peytte turghanda, sherqi asiyada bir meydan urush bashlanghan haman, junggoning bu pilanini choqum qalaymiqanlashturuwétidu, junggo bashqa bir tereptin 'shangxey hemkarliq teshkilati' arqiliq afghanistanni we bu dölette turushluq amérika armiyisini qorshawgha élip signal bérip, amérikini iskenjige élish arqiliq sherqi asiya urushini tosup qélish kérek; belki amérikigha: sherqi asiyada urush partlaydighan bolsa, arqidinla zor kölemlik ottura sherq urushi we jenubiy amérikida hetta amérika qiteside urush partlaydu dep agahlandurush bérish kérek" dep körsetti.
qarighanda, aptor jyen ki yaki éliship qaldi, yaki wehime peyda qilish arqiliq junggo jemiyitige signal bermekchi boldi weyaki junggo hökümiti yuqiriqi ziddiyetlerdin qutulush üchün koriye yérim arilida herbiy tewekkülchilik qilmaqchi boldi.