Дилбәр тохти әрзини давамлаштурмақта

Йәкән наһийисидики дилбәр тохти ханимниң, йәкән сақчиханида тайақ зәрбисидин өлгән ери мәмәт турсун ташниң өлүмидин бурунқи балиси билән чүшкән сүрити.

Бизниң хәвиримиз берилгәндин кейин, өз исмини ашкарилашни халимиған мәлум киши, радиомизниң уйғур бөлүмигә мәрһум мәмәт турсун ташниң һаят чеғидики рәсими һәм өлүп кәткән чеғида қанун дохтурлири тәрипидин тартилған рәсимини йоллиди.

Мушу мунасивәт билән биз мәрһумниң аяли дилбәр тохти ханимни қайта зиярәт қилдуқ. Зияритимиз җәрянида дилбәр тохти ханим бизгә мәрһумниң һаят чеғида тартилған сүритиниң, мәрһум өлүп кетиштин 15 күн бурун оғли билән чүшкән сүрити икәнликини сөзләп бәрди.
 
Дилбәр тохти ханим бизгә бу ишниң тәпсилатини яхши билидиған кишиләрдин, мәмәт турсун ташниң аниси сәмәрхан обулниң телефон номурини бәрди. Зияритимизни қобул қилған, мәмәт турсун ташниң аниси сәмәрхан обул ханим, оғлиниң наһәқ өлүп кәткәнликини һәм 3 йил җәрянида өзлириниң әрз қилип, һәтта бейҗиңғичә барғанлиқини баян қилди.

Биз дилбәр тохти һәм сәмәрхан обул ханим бәргән учурға асасән мәрһумниң уруқ - туғқанлири, қолум ‏ - қошнилири, шундақла бу ишниң тәпсилатидин хәвири бар һөкүмәт тәрәп адәмлиридин дилбәр тохти турушлуқ аһалә комитетиниң башлиқи алимҗан әпәнди, йәкән гүлбағ сақчиханиниң муавин башлиқи аблимит қатарлиқларни зиярәт қилдуқ.

Мәмәт турсун ташниң кичик аниси бу дело һәққидики қаришини мундақ баян қилди...

Мәмәт турсун ташниң өлүми йәкән наһийиси тәвәсидә зор инкас қозғиған болуп, вәқәниң тәпсилатини һәм бу аилә кишилириниң 3 йилдин буян, бу наһәқ дело устидин әрз қилип келиватқанлиқини баян қилған, мәмәт турсун ташниң бир қошниси оз пикрини мундақ баян қилди.

Бу қетим зияритимизни қобул қилған дилбәр тохти ханим, ериниң өлүмигә сәвәб болған солақхана башлиқи шу тоңренниң қәшқәр вилайәтлик вали мәһкимисидә ишләйдиған бир әмәлдар туғқини, бу делониң бир тәрәп қилинишиға тосқунлуқ қиливатқанлиқини, шу сәвәбтин нурғун кишиләрниң бу делоға қол тиқиштин баш тартиватқанлиқини, өзиниң әрзиниңму тосқунлуққа учраватқанлиқини баян қилип өтти.

Биз дилбәр тохтиниң әрз қилиш җәрянидики ишларни бир қәдәр яхши билидиған һөкүмәт тәрәп хизмәтчилиридин дилбәр тохти турушлуқ аһалә комитетиниң башлиқи алимҗан әпәндини зиярәт қилдуқ.

У бизгә мәмәт турсун ташниң сақчиханиниң солақханисида сорақ җәрянида өлүп кәткәнлики вәқәсидин таза хәвири йоқлуқини, әмма өзиниң дилбәр тохти билән сақчихана оттурисидики мурәссәгә қатнашқанлиқини баян қилип өтти.

У сөһбәт җәрянида, гәрчә йәкән наһийилик һөкүмәт тәрәпниң, дилбәр тохтини ериниң делоси устидин әрз қилиштин ваз кечишкә мәҗбурлиғанлиқини инкар қилған болсиму, лекин өзиниң һөкүмәт тәрәпкә вакалитән дилбәр тохтиға әрз қилиштин ваз кечиш һәққидә хизмәт ишлигәнликини баян қилип өтти.

Биз йәкән наһийилик гүлбағ йезилиқ сақчиханиға телефон қилип, әһвал игилимәкчи болғинимизда, сақчиханида ишләйдиған хадимлар өзлириниң йеңидин кәлгинини, шуңа бу делодин хәвири йоқлуқини баян қилишти.

Сақчихана башлиқи аблимит абдуришит болса өзиниң 2007 - йили бу идаригә йөткилип кәлгәнликини, шуңа бу ишниң тәпсилатидин таза хәвири йоқлуқини, пәқәтла мәмәт турсун ташниң әйни чағда дохтурханиға вақтида елип берилмиғанлиқи учун өлүп кәткәнликини баян қилди.

Әмма дилбәр тохти вә мәмәт турсун ташниң аниси сәмәрхан обул ханим бизгә, сақчиларниң мәмәт турсун ташниң қорсиқиға тәпкини үчүн үчийи үзүлүп кәткәнликини, сақчиханидикиләрниң униң һаяти билән кари болмиғанлиқини, әксичә өзлиригә мәрһум аллиқачан өлүп болғандин кейин хәвәр қилғанлиқини мундақ баян қилған иди.

Йәкән тәвәсидә йүз бәргән бу дело уйғур тор бәтлиридә бәс - муназирә қозғиған болуп, ғәзәпләнгән кишиләр бу дилоға четишлиқ болған 2 нәпәр хитай сақчисиниң қанун бойичә җазаға тартилишини тәләп қилип өз пикирлирини баян қилған.