Б д т тән җазасиға қарши туруш комитети доклатида уйғурлар мәсилиси тәкитләнди

Б д т тән җазасиға қарши туруш комитетиниң 4 - нөвәтлик йиғини 11 - айниң 3 - күнидин 21 - күнигичә б д т ниң җәнвәдики баш шитабида чақирилған иди.
Мухбиримиз әкрәм
2008-11-25
Share
Hoten-kesilgen-barmaq-305.jpg Уйғур дийариниң хотән вилайитидә әркин асийа радиосини аңлиғанлиқи үчүн 2003 - йили 6 - айниң бешида қолға елинған абдулла әпәнди, 11 - айғичә қамап қойулған болуп, бу 5 ай җәрйанида еғир дәриҗидә тән җазасиға учриған, тән җазаси җәрйанида униң бир қоли мейип болған. Сүрәт, абдулла әпәндиниң икки бармиқи кесилип мейип болған бир қоли.
RFA Photo / Erkin Tarim

21 - Ноябир күни тән җазасиға қарши туруш комитети йиғинниң хуласиси сүпитидә 15 бәтлик бир доклат елан қилған. Хитайдики тән җазаси мәсилиси әйибләнгән бу доклатта уйғур сиясий мәһбуслириниң тән җазасиға учраш әһвалиғиму бәлгилик орун берилгән.

Мәзкур доклатниң дәсләпки қисмида, хитай һөкүмитиниң б д т тән җазасиға қарши туруш комитетиниң чақириқиға аваз қошуп бәзи иҗабий қәдәмләрни басқанлиқи, мәсилән: 2001 - 2005 - 2007 - йиллири тән җазасиға қарши бәзи қанунларни чиқарғанлиқи, йәнә бәзи қанунларға түзитиш киргүзгәнлики вә бәзи иҗабий сиясәтләрни бәлгилигәнлики һәмдә бу қетимқи тән җазасиға қарши туруш йиғиниға актип иштирак қилип, йеқиндин маслашқанлиқи тилға елинған болсиму, қалған қисмида хитайда мәвҗут болуватқан еғир җаза мәсилилири тилға елинған.

Б д т ниң бу қетимқи йиғиниға тәклип билән қатнашқан бир гуруппа уйғур вәкиллири, 6 - ноябир күни уйғур сиясий мәһбуслириниң тән җазасиға учраш әһваллирини әмәлий пакитлири билән оттуриға қоюп, 31 кишилик хитай вәкилләр өмикини нәқ мәйданда осал әһвалға чүшүрүп қойған иди.

Хәвәрләргә қариғанда, хитайниң ташқи ишлар баянатчиси чин гаң б д т ниң бу доклатини дәрһал инкар қилип, наразилиқ баянати бәргән. Әмма йиғинға қатнашқан дуня уйғур қурултийи баш катипи долқун әйса әпәнди хитайниң бу доклатта оттуриға қоюлған соалларға 2010 - йили 11 - айға қәдәр җаваб бериш мәҗбурийити барлиқини әскәртти.    

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт