Uyghur ayallirida kökrek rakining xewpi éghirlashmaqta

Kökrek raki (emchek raki, süt bézi raki depmu atilidu)gha giriptar bolup qélishning sewebliri nahayiti köp, bu késellik asasen ayallarda uchraydu. Erlerning bu késelge giriptar bolush nisbiti 2 pirsentkimu yetmeydu, yéqinqi yillarda Uyghur ayallirida téz köpiyiwatqan késellerning biri, bu késellikning sewebliri intayin köp shundaqla bu heqte éniq melumat yoq, emma hamilidarliqtin saqlinish dorisini uzun istémal qilish, rohi bésim, irsiyet, ayallarning héyiz kélish we héyizdin toxtash waqtining normalsizliqi, süt bézi késelliklirining kökrek raki bilen munasiwetlik ikenliki éniqlan'ghan.

Hazirghiche opératsiye qilip éliwétish bu késelni dawalashta eng köp qolliniliwatqan usul hésablinidu, shunga bu xil késel ayallarning saghlamliqigha éghir ziyan yetküzüpla qalmay ularning beden güzellikige chong yoqitish, rohigha ömürlük éghir azablar élip kelmekte.

Ürümchidiki ösme késellikler doxturxanisida süt bézi raki késili seweblik bir köksi opératsiye qilip éliwétilgen, nöwette ximiyilik dawaliniwatqan emdila 30 yashtin bir yash ana, balilirining özige hayati ümid bexsh etkechkila aghriq we rohiy azablirigha berdashliq bériwatqanliqini hemde ümid bilen yashawatqanliqini bildürdi.

Bu xanim yene, oxshash késelge giriptar bolup özi bilen teng dawaliniwatqan Uyghur ayallirining köplükidin heyran qalghanliqini, tolisi Uyghur élining jenubidin kelgen Uyghur ayallar ikenlikini sözlep berdi.

Uyghur éli sehiye da'irilirining bir qanche yillardin buyan élip barghan tekshürüshlerdinmu baliyatqu boyni rakidin qalsa, kökrek rakining Uyghur ayallirining hayatigha tehdit élip kéliwatqan eng chong késellik ikenliki melum bolghan, gerche da'iriler bu heqtiki san we statistikilarni ashkarilimighan bolsimu, Uyghur élining tébbiy sahesige da'ir ilmiy doklatlarda “Süt bézi raki Uyghur rayonidiki ayallargha xewp élip kéliwatqan ikkinchi chong késellik” dégen üzündilerni köp jaylarda uchritalaymiz. Ilgiri Uyghur élide doxtur bolup xizmet qilghan chaghlirida mexsus mushu türde tetqiqat élip barghan, hazir en'gliyide yashawatqan ösme késellikliri mutexessisi enwer toxti ependi, Uyghur ayallirida kökrek raki késellikining ehwali we sewebliri heqqide toxtaldi.

Enwer toxti ependi Uyghur ayallirining kökrek késelliklirining aldini élishqa bir qeder sel qarash, turmush we rohiy bésimning éghirliqi, iqtisadiy we yashash muhitining nacharliqi qatarliq amillarningmu Uyghur ayallirida kökrek rakining köpiyishide rol oynawatqan muhim amillar dep qaraydighanliqini, Uyghur ayalliri bu késelning aldini élish üchün eng awwal kökrek saghlamliqigha alahide ehmiyet bérishi kéreklikini, kökside her qandaq binormalliq bayqalghan haman derhal waqit ötküzmey tekshürtüsh kéreklikini, héch bolmighanda bir yilda bir qétim mexsus tekshürtüsh élip bérishni adet qilishi kéreklikini tekitlidi.

Kökrek raki gerche qorqunchluq rak késelliklirining biri türi bolsimu, emma mutexessisler opératsiye qilip, ximiyilik we radi'atsiyilik dawalashtin kéyin bimarning 10 yil ömür körüsh nisbitining 90% tin yuqiri bolidighanliqini, bolupmu bu xil rakni qanche baldur bayqighanda, hayat qélish nisbitige shunche aktip rol oynaydighanliqini, shunga ayallarning öz saghlamliqi üchün, bedinidiki bala émitishtin bashqa muhim funksiyilik rolgha ige orun hem güzellikining bir qismi bolghan kökrek saghlamliqigha ehmiyet bérishini teshebbus qilidu.