Besh burjeklik bina xitaygha taqabil turush üchün sün'iy eqil téxnikisigha zor meblegh salidiken

Washin'gtondin muxbirimiz irade teyyarlidi
2023.09.07

Amérika dölet mudapi'e ministirliqining péntagon (besh burjeklik bina) diki bash ishtabi xitay tehditige taqabil turush üchün kelgüsi ikki yil ichide sün'iy eqil téxnikisigha zor meblegh salidiken.

 “Wal-sitrit zhurnili” gézitining bu heqtiki mexsus xewiride mundaq dégen:

 “Besh burjeklik bina kelgüsi ikki yil ichide xitay we bashqa düshmen döletlerning tehditige taqabil turush üchün, sün'iy eqil téxnikisi, ademsiz uchqu (dron) we bashqa aptomatik sistémilarni keng kölemde yolgha qoymaqchi.”

Amérika dölet mudapi'e ministirliqining mu'awin ministiri katlin hiks (Kathleen Hicks) 6-séntebir charshenbe küni axbaratlargha qilghan sözide, besh burjeklik binaning bu qurulushqa nechche yüz milyon dollar meblegh salidighanliqini, uning nechche minglighan hawa, quruqluq we déngizni asas qilghan sün'iy eqil sistémisi ishlepchiqirishni asas qilidighanliqini ilgiri sürgen.

 Amérika dölet mudapi'e ministirliqining sün'iy eqil sistémilirini tézdin tereqqiy qildurush we orunlashturushi, nuqtiliq halda xitayning bu sahediki tereqqiyati peyda qilidighan tehditke taqabil turushni meqset qilidiken. Mu'awin dölet mudapi'e ministiri hiks shu künki sözide mundaq dégen: “Biz urush ichide emes we urush qilishnimu xalimaymiz. Biraq biz bu xizmetlerning urush jiddiyiti ichide tézdin ilgirilishini qolgha keltürüshimiz kérek. Chünki xitay bizni saqlap turmaydu” .

Melum bolushiche, aldinqi hepte amérika dölet mudapi'e ministirliqi yer sharining bixeterlikige künséri tehdit shekillendürüwatqan xitay armiyesining tesir da'irisini chekleshni meqset qilghan mexsus türni yolgha qoyghan bolup, bu türge “Köpeytküchi” dep nam bérilgen. Besh burjeklik bina bu türge zor meblegh sélip, nechche minglighan sün'iy eqil türliri arqiliq qozghitilidighan sistémini ishqa kirishtüridighanliqini bildürgen, emma buning tepsilatini ashkarilimighan.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.