Австралийә хитайниң тинч окян дөләтлиридики керәксиз қурулушлирини тәнқид қилди

Мухбиримиз шөһрәт һошур
2018.01.10
Share on WhatsApp
Share on WhatsApp

Австралийәниң хәлқара тәрәққият министири консетта велс ханим хитайниң тинч окяндики арал дөләтлиригә селиватқан керәксиз қурулушлирини тәнқид қилди.

Өзиниң микронезийә, фиҗи, тонга қатарлиқ арал дөләтлиригә 24 қетимдин артуқ зиярәт елип барғанлиқи вә бу җәрянда хитай тәрипидин селинған, әмма толуқ ишлитилмигән көп сандики қурулушларни көргәнликини тилға алған министир консетта велс ханим, хитайниң бу бир йүрүш пайдисиз қурулушларни пәқәтла өз тәсирини кеңәйтиш үчүн салғанлиқини, бу қурулушларниң мәзкур дөләтләрниң аһалилиригә қарита әмили болған пайдилиниш қиммитиниң йоқлуқини илгири сүргән.

Министир консетта ханим хитайниң бу ярдимини әпсаниләрдики падишаһларниң “ақ пил” һәдийәсигә, йәни пайдиланғили болмайдиған, әксичә путликашаң болидиған бир һәдийәгә охшатқан. Хитай ташқи ишлар министирлиқиниң баянатчиси лү каң бүгүн мухбирларниң бу һәқтики соалиға җавабән, мәзкур қурулушларниң тинч окян арал дөләтлири хәлқлириниң җениға әсқетиватқанлиқини вә бу қурулушларниң шу дөләт һөкүмәтлириниң алқишиға еришкәнликини баян қилған. 

Фирансийә ахбарат агентлиқиниң бүгүнки бу һәқтики хәвиридә баян қилинишичә, хитайниң тинч окян районида өз тәсирини күчәйтиш урунушлири йеқидин буян австралийә даирилирини сәгәкләштүргән. Алдинқи айда австралийә баш министири чәт дөләтләрниң австралийә сияситигә җасуслар арқилиқ қол тиқишиниң алдини елиш һәққидә қанун мақуллашни оттуриға қойған болса, австралийә әмгәк партийәсиниң әзаси сам дастяри хитай ширкити билән һәмкарлиқи сәвәблик австралийә парламентидики вәзиписидин истепа беришкә мәҗбур болған.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт