Хитай б д т кишилик һоқуқ комиссариниң уйғур елидики лагерлар мәсилиси һәққидики сөзидин қаттиқ биарам болди

Мухбиримиз ирадә
2018-09-11
Елхәт
Пикир
Share
Принт

Б д т ниң йеңи сайланған кишилик һоқуқ алий комиссари мишел бачелит дүшәнбә күни б д т кишилик һоқуқ кеңишиниң йиғинида сөз қилип, уйғур районидики «қайта-тәрбийәләш» лагерлири мәсилисиниң тәкшүрүлүши керәкликини ейтқан иди.

Буниң билән, сәйшәнбә күни хитай ташқи ишлар баянатчиси гең шуаң дәрһал буниңға инкас қайтуруп мишел ханимни хитайниң игилик һоқуқини һөрмәт қилишқа чақирған.

Ройтерс агентлиқиниң хәвиридин қариғанда хитай баянатчи гең шуаң 11-сентәбир күнидики баянатида йәнә кишилик һоқуқ кеңиши вә алий комиссарни «бир тәрәплимилик» билән әйиблигән.

Һалбуки, йеңи кишилик һоқуқ комиссари мишел бачелит сөзидә, өткән айда ирқий айримичилиққа қарши туруш комитети тәрипидин оттуриға қоюлған шинҗаң уйғур аптоном районидики йепиқ тәрбийә лагерлириға аит доклатларниң ишәнчлик мәлуматлар асасида йәкүнләнгәнликини алаһидә әскәртип, хитай һөкүмитидин б д т ниң районда мустәқил тәкшүрүш елип беришиға йол қоюшини тәләп қилған иди.

Ройтерсниң өз хәвиридә ейтишичә, хитай тәрәпниң инкаси униң бундақ бир тәкшүрүшкә йол қоймайдиғанлиқи яки буниңға б д т ниң арилишишини халимайдиғанлиқидин дерәк беридикән.

Дүшәнбә күни, хәлқара кишилик һоқуқни көзитиш тәшкилатиму йеңи дәлилләр асасида бир муһим доклат елан қилип, хитай һөкүмитиниң уйғурларни «кәң көләмдә халиғанчә тутқун қилип, тән җазаси бериватқанлиқи, хорлаватқанлиқи вә күндилик турмушниң барлиқ саһәлирини қаттиқ контрол қиливатқанлиқи» ни билдүргән иди. Бирақ, хитай һөкүмити бу доклатниму рәт қилған.

Чәтәлләрдики көзәткүчиләр бу һәқтә тивиттер торидики инкаслирида, әгәр һәқиқәтән юқиридики органлар бир тәрәплимилик қиливатқан болса, у һалда хитай һөкүмитини хәлқара мәтбуатларниң мухбирлири вә мустәқил тәкшүргүчиләрниң районға беришидин қорқмаслиққа, уларниң берип әмәлийәтни көрүп келишигә пурсәт яритип беришкә чақирди.

Пикирләр (0)
Share
Толуқ бәт