Pirézidént donald tramp wezipige olturghandin kéyin shi jinping bilen sözleshkenlikini éytqan

Roytérs agéntliqining 11-féwraldiki xewirige asaslan'ghanda, amérika pirézidénti donald tramp özining xitay dölet re'isi shi jinping bilen 20-yanwar wezipige olturghandin kéyin sözleshkenlikini éytqan. Emma söhbet témisi toghrisida tepsiliy uchur bermigen.

Düshenbe küni, yeni 10-féwral foks xewerliri qanili tiramptin uning amérika pirézidéntliq wezipisige olturghandin buyan xitay rehbiri shi jinping bilen sözleshken sözleshmigenlikini sorighanda, u mundaq dégen: “He'e… men uning bilen paranglashtim, men uning xelqi bilenmu sözleshtim. Bizning nahayiti yaxshi shexsiy munasiwitimiz bar”.

 Pirézidént donald tramp shi jinping bilen qaysi küni sözleshkenliki we némilerning muzakire qilin'ghanliqi toghrisida tepsiliy uchur bermigen.

Emma, pirézidént donald tiramp bilen shi jinping 20-yanwar küni u wezipige olturushtin burunmu bir qétim sözliship, tik-tok, soda we teywen qatarliq mesililerni muzakire qilghan idi.

Pirézidént donald tramp xitay mallirigha 10 pirsent baj qoyup buni ötken hepte resmiy ijra qilishining arqisidin, 9-féwral küni yene chet el polat-tömür we alyumin mehsulatlirigha 25 pirsent baj qoyidighanliqini élan qilghanidi. Bumu, xitayning amérikagha qaratqan polat-tömür we alyumin éksportigha éghir zerbe béridu dep qaralmaqta.

Pirézidént donald tramp aldinqi hepte, dunyadiki ikki chong iqtisadiy gewde otturisidiki yéngi soda urushini peseytishke aldirimaydighanliqini éytqanidi.

 Pirézidént donald tramp bilen shi jinping otturisida bolghan bu qétimqi sözlishish amérikaning xitaygha qaratqan tamozhna béjini boshitish yaki kéchiktürüshte intayin muhim dep qaralmaqta.