Xitay merkizi intizam tekshürüsh da'iriliri erzidarlarni tutqun qilishqa yol qoyulmaydighanliqini bildürdi

Xitay merkizi intizam tekshürüsh da'iriliri charshenbe küni yerlik organlarni agahlandurup, erzidarlarni tutqun qilishqa yol qoyulmaydighanliqini bildürgen.

Xitay “Xelq géziti” ning xewer qilishiche, merkizi intizam tekshürüsh komitétining yuqiri derijilik emeldari jang shawlung, erz - shikayet orunlirining erzidarlarni qizghin kütüwélishi kéreklikini bildürüp, erzidarlarni erziyet ishxanisi yaki ammiwi sorunlarda tutqun qilishqa yol qoyulmaydu, dégen. Biraq bezi közetküchiler, jang shawlungning sözide kawak barliqini bildürüp, bu, erzidarlarni erziyet ishxanisi sirtida yaki gheyri ammiwi sorunlarda tutqun qilishqa bolidu, dégendin bisharet béridighanliqini ilgiri sürgen.

Xitay kompartiye bash sékritari shi jinping hakimiyetke chiqip, chériklikke qarshi turidighanliqini tekitlep kelgen bolsimu, biraq yerlik emeldarlarning yolsizliqigha qarshi turghan erzidarlarni basturup keldi. Üchturpanliq Uyghur erzidar nurgul toxti ilgiri béyjinggha erz qilip bérip, oghlini bulap ketken xitay adem bédikini jazalap bérishni telep qilghan. Biraq, üchturpan yerlik da'iriliri béyjinggha adem ewetip nurgulni tutup kelgen we üchturrpandiki bir tutup turush ornigha uzun mezgil qamap qoyghan. Yerlik hökümetlerning béyjinggha saqchi ewetip, erzidarlarni tutup kélip qamap qoyidighan ehwal xitayda omumiyüzlük mewjut hadise.