Ma shingrüy qeshqerde “Muqimliq” we “Jungxu'a milliti ortaq gewdisi éngi” ni mustehkemleshni telep qilghan

Uyghur aptonom rayonluq partkomning sékrétari ma shingrüy qeshqerde mexsus xizmet ziyaritide bolghan bolup, uning qeshqerde “Jem'iyet muqimliqi” we “Jungxu'a milliti ortaq gewdisi éngi” ni yenimu mustehkemlesh toghriliq mexsus körsetme bérishi, közetküchilerning küchlük diqqitini qozghimaqta.

Xitayning “Tengritagh tori” we “Shinjang géziti” qatarliq hökümet taratqulirining xewirige qarighanda, ma shingrüy 11-ayning 4-künidin 5-künigiche qeshqer wilayitide mexsus xizmet tekshürüshide bolghan. U bu jeryanda mekit we yopurgha nahiyeliridiki jama'et xewpsizlik idariliri, saqchixana, saqchi ponkitlirini közdin köchürgen, shundaqla saqchi organlirining qattiq zerbe bérishni dawamlashturush heqqide körsetme bergen.

Xewerde déyilishiche, ma shingrüy “Jem'iyet muqimliqini qoghdashni bash orun'gha qoyup, térrorluqqa qarshi turush, muqimliqni qoghdashni yenimu chingitish kérek. ‛üch xil küch‚ ke qattiq zerbe bérishtek yuqiri bésimliq halitini qet'iy tewrenmey saqlap, yoshurun xewpni yüz bérishti burun, yeni böshükidila ujuqturush kérek” dégenlerni tekitligen.

Ma shingrüy yene mundaq dégen: “Jenubiy shinjangning pütkül shinjang xizmitidiki alahide muhim ornini chongqur igilep, jungxu'a milliti ortaq gewdisi éngini mustehkemleshtin ibaret asasiy liniyeni chöridep, bingtüen bilen yerlikning yughurulushini kücheytish kérek…؛ din ishlirini idare qilish iqtidarini yenimu kücheytip, islam dinini xitaychilashturush qedimini chongqur algha siljitish kérek.”

Igilinishiche, xitay kompartiyesi merkiziy komitéti siyasiy biyurosining da'imiy ezasi, xitay memliketlik siyasiy kéngishining re'isi wang xuning téxi yéqinda Uyghur élining qeshqer we xoten wilayetliride tekshürüshte bolghanda, muqimliq tedbirliri bilen “Jungxu'a milliti ortaq gewdisi éngi” ni kücheytishini telep qilghan idi. Közetküchiler, wang xuningning arqisidin ma shingrüyning yene qeshqerge bérip, jama'et xewpsizlik idariliri, saqchixana we saqchi ponkitlirini ziyaret qilishi hemde yuqiri bésimliq zerbe bérishni dawamlashturushni telep qilishi, Uyghur élining siyasiy weziyitining téximu yamanlishidighanliqidin dérek béridu, dep qarimaqta.