Xitayning meschit chéqish weqesi türk metbu'atliridimu xewer qilindi

Xitay da'irilirining ötken üch ayda qeshqer, xoten we aqsularda xelq'ara jama'ettin yoshurun halda élip barghan meschit chéqish herikiti bir heptidin buyan bir qisim türk axbarat wasitiliri teripidinmu xewer qilindi.

Türkiyediki aldinqi qatardiki 4 chong gézitning biri bolghan we erdoghan hökümitige qarita mayilliqi bilin'gen yéngi shepeq géziti tünügünki sanida mezkur heriketni “Sherqi türkistanda meschit bit-chiti” dégen témida xewer qildi.

Xewerde, 3500 che meschitning da'iriler teripidin bixeterlikni bahane qilip chéqiwétilgenliki eskertildi. Muslim port namliq xewer tori we yéngi aqit géziti, muqimliqni saqlashqa qurbi yetmigen xitay hökümitining öchini meschittin alghanliqini ilgiri sürdi. Xewerde yene, mezkur meschit chéqish weqesining yerlik musulmanlarning qelbide bir jarahet peyda qilghanliqi, bu jarahetning choqum bundin kéyinki jem'iyet hadisiliride eks étidighanliqi eskertildi.

Türkiyede Uyghurlar teripidin türkche chiqiriliwatqan Uyghurnét tori meschit chéqish weqesi heqqide ikki hepte awwal uchur we mulahizilerni xewer qilghan idi.