Uyghur mahirlar xitayning boks musabiqiside altun médalgha érishken

Xitay axbarat wasitilirining xewer qilishiche, 27-öktebir küni ayaghlashqan 2024-yilliq “Memliketlik erler boks lewhe talishish musabiqisi” da, “Shinjang komandisi” namida musabiqige qatnashqan mahirlar altun we kümüsh médallargha ériship, Uyghurlarning boks sahesidiki talantini yene bir qétim jari qildurghan.

Xitay bashqurushidiki “Tengritagh tori” ning 29-öktebirdiki xewiride éytilishiche, “Memliketlik erler boks lewhe talishish musabiqisi” xitaydiki bokis saheside eng yuqiri sewiyelik musabiqe hésablinidighan bolup, bu yilqi musabiqe 37 komandigha mensup 600 din oshuq bokschi qatnashqan. Uyghurlardin abduréshit rehimolla 92 kilogiramliqlar derijisi boyiche reqiblirini bir-birlep yéngip, eng axirida altun médalgha érishken. Uning sepdashliridin elqut qahar 75 kilogiramliqlar derijisi boyiche kümüsh médal alghan. Qazaq mahirlardin érdewlet mayrambék 71 kilogiramliqlar derijisi boyiche mis médal alghan. Uyghur aptonom rayonluq bokis merkizining mudiri abdushükür mijit bu heqte toxtilip, “Parizh olimpik musabiqisidin kéyin dölet komandisidiki pütün mahirlar öz jaylirigha qaytip keldi we bu qétimqi musabiqige qatnashti. Shunga buningda médal élish undaq asan emes” dégen.

Melum bolushiche, yéqinqi yillardin buyan Uyghur mahirlar tenterbiye türide oxshimighan netijilerni yaritip, Uyghurlarning ten jehettiki sapasining yaxshiliqini emeliy heriketliri arqiliq namayen qilip kelmekte. Shuning bilen birge tenterbiye sahesi xitayning irqiy qirghinchiliqni yoshurushtiki aktip wasitilerdin biri bolup kelmekte.