Үрүмчиниң тәңритағ районида қой вә кала гөши сетиш тохтитилип, ноқул чошқа гөши сетилидиғанлиқи елан қилинди

Мухбиримиз әркин
2020-07-27
Share

Йәрлик даириләр үрүмчиниң тәңритағ районида қой вә кала гөши тәминати тохтитилип, мусулманлар олтурушлуқ бу районни пәқәт чошқа вә тоху гөши билән тәминләйдиғанлиқини елан қилған. Хитай даирилириниң қурбан һейт һарписида карантин астидики мусулманлар районини ноқул чошқа гөши билән тәминләйдиғанлиқини елан қилиши чәтәлдики көзәткүчиләрниң диққитини қозғиди. Уларниң тәкитлишичә, бу карантин астидики мусулманларни амалсиз чошқа гөши йейишкә мәҗбурлашниң бир хил усули икән.

Тәңритағ районлуқ сода идариси 25-июл күни һәр қайси көктат, гөш дуканлириға вә гөш, көктат тәминат нуқтилириға уқтуруш чүшүрүп, запас қой вә кала гөши тәминатиниң вақитлиқ тохтитилғанлиқи, лекин чошқа вә тоху гөши билән давамлиқ тәминләйдиғанлиқини билдүргән. Сода идарисиниң уқтурушида, бу райондики барлиқ гөш дуканлириниң гөшни бирдәк «тәңритағ хуаңню деһқанчилиқ-чарвучилиқ пән-техника ечиш чәклик ширкити» дин киргүзүши тәләп қилинған.

Хитай даирилириниң қурбан һейт һарписида туюқсиз бу уқтурушни чиқиришиға қандақ амил сәвәб болғанлиқи мәлум әмәс. Тәңритағ районлуқ сода идарисиниң уқтурушида буниң сәвәби чүшәндүрүлмигән. Униңда пәқәт юқириниң җиддий уқтурушини тапшуруп алғанлиқи тәкитләнгән. Нөвәттә хитай һөкүмитиниң уйғур мусулманлириниң чошқа гөши йейиш-йемәсликини уларниң хитай дөлити вә хитай компартийәсигә садиқ яки әмәсликини синайдиған бир хил өлчәм қиливалғанлиқи мәлум.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.