Уйғур даирилириниң рамизанниң тунҗи күнидә хитай мәдәнийәт байримини тәшвиқ қилиши тәнқидкә учриди

Мухбиримиз меһрибан
2017-05-30
Share

26-Май башланған дуня мусулманлириниң муқәддәс ейи рамизан бу йил хитайниң әнәниви мәдәнийәт байрими "зуңза йейиш" йәни хитай ривайәтлиридики чу бәглики өлимаси чүййүәнни хатириләш байримиға тоғра кәлди.

Уйғур райони һөкүмәт таратқулириниң хәвәрлиридә бирнәччә күндин буян "уйғур диярида һәр милләт хәлқи бир аилә кишилиридәк инақ кәйпиятта зуңза йәп байрамни күтүвалди" дегәндәк хәвәрләрниң көпийиши, уйғурларниң диний етиқад паалийәтлири бастурулуп, роза тутуш, намаз оқуши қаттиқ чәклимигә учраватқан мәзгилдә, чәтәлләрдики уйғур паалийәтчилири вә уйғур вәзийәт анализчилириниң җиддий диққитини қозғиди. Фейсбок, ватсап қатарлиқ иҗтимаий алақә мунбәрлиридә болса тәнқидкә учриди.

Тәнқидләрдә, бу йиллиқ рамизан мәзгилидә даириләрниң оқутқучи-оқуғучилар, һөкүмәт хизмәтчилири роза тутмаслиқ, ресторанларни тақашқа рухсәт қилмаслиқ уқтурушлирини тарқатқандин башқа, хитай мәдәнийитигә хас болған әнәниви байрамларни уйғурларға мәҗбурий теңиш, рамизан мәзгилидә миллий иттипақлиқ паалийәтлири намида уйғурларни хитайлар билән бирликтә тамақ йейишкә зорлаш, көңүл ечиш паалийәтлирини өткүзүш қатарлиқ һәр хил васитиләрни қоллинип, уйғурларни роза тутуштәк мусулманлиқ пәрһизлирини ада қилиштин мәһрум қиливатқанлиқи әйибләнди.

Зуңза байрими хитай ривайәтлиридә, вәтәнпәрвәрликниң символи дәп мәдһийилинидиған чүййүәнниң өзини дәряға ташлап өлүвалғанлиқини хатириләш үчүн өткүзүлидиған әнәниви байрам.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт