Үрүмчи шәһириниң сабиқ секретари яң гаң 12 йиллиқ қамаққа һөкүм қилинди

Уйғур аптоном райониниң сабиқ партком секретари ваң лечуән дәвридә көп хил һоқуқларни тутқан сабиқ уйғур аптоном райони муавин рәиси яң гаң бейҗиң шәһири соти тәрипидин парихорлуқ җинайити билән түрмә җазасиға мәһкум қилинди.

Фирансийә агентлиқиниң хәвәр қилишичә, “хитайниң тинчсиз райони шинҗаң”ниң сабиқ муавин партком секретари яң гаң парихорлуқ җинайити билән 12 йиллиқ қамақ җазасиға һөкүм қилинған болуп, униң 14милйон сом йәни америка доллири бойичә 2милйон 100 миң доллар пара йегәнлики бекитилгән.

Хитай ахбарат васитилириму яң гаңниң сотлиниши һәққидә хәвәр бәргән болуп, “җуңго ахбарат тори”ниң хәвәр қилишичә, бейҗиң шәһәрлик 3-оттура хәлқ сот мәһкимиси мәмликәтлик сиясий кеңәш иқтисадий комитетиниң сабиқ муавин мудири яң гаңниң пара елиш делоси үстидә ашкара һөкүм чиқирип, униңға муддәтлик 12 йиллиқ қамақ җазаси берилгән, 1 милйон сомлуқ шәхсий мал-мүлки мусадирә қилинған.

Сот мәһкимиси, җавабкар яң гаңниң 1998-йили апрелдин 2012-йилиниң кейинки йеримиғичә уйғур аптоном районидики вә бейҗиңдики һәр хил саһәләрдики вә һәр хил дәриҗидики рәһбәрлик орнидин пайдилинип, өткүзгән қилмишлирини санап чиққан. Сот мәһкимиси йәнә униң 2008-йилидин 2013-йилиғичә, өзи биваситә вә яки хотуни, пәрзәнти арқилиқ башқиларниң 13 милйон 792 миң 765 сом қиммитидики пул-мелини алғанлиқини бекиткән.

Бейҗиң шәһәрлик 3-оттура хәлқ сот мәһкимиси яң гаңниң қилмишини пара елиш җинайити дәп бекиткән болуп, униң җинайәт пакитлирини актип тапшурғанлиқи, гунаһини тапшуруш ипадиси барлиқи вә барлиқ заң пул, мални актип тапшурғанлиқи үчүн җинайитини йениклитип бир тәрәп қилған.

Яң гаң уйғур аптоном райони парткоминиң секретари ваң лечуән дәвридә, йәни 2009-йилидики үрүмчи вәқәсиниң алди-кәйнидә үрүмчи шәһәрлик парткомниң секретари, уйғур аптоном районлуқ парткоминиң муавин секретари, уйғур аптоном районлуқ һөкүмәтниң муавин рәиси вә башқа бир қатар вәзипиләрни өтигән иди.